WILLEMSTAD.- E hòmber N.S. (47) ayera a keda kondená na 5 aña di kastigu di prizòn, despues ku hues a pone un aña di kastigu riba e demanda di 4 aña.

N.S. ta keda akusá ku dia 10 di mei último, el a menasá su víktima di kual e tabatin un relashon amoroso kuné, oblig’e hasi aktonan seksual, maltrat’é, push’e, ranka su paña kibra fo’i su kurpa, kibra su panty, dal’é moketa den su kara, destruí su vasnan i bis’é ku e no ta bai fo’i su kas sin tene relashon kuné.

Kontra di su boluntat e akusado a hasi aktonan seksual ku su víktima, dor di viol’é i a maltrat’é vários bia ku un kabisá. Tambe e ta keda akusá di tabatin 2 arma.

Durante tratamentu di e kaso N.S. a splika ku no ta bèrdat ku e tin arma di kandela.

Segun e akusado e dos armanan ku polis a haña durante entrada hudisial tabata riba kashi.

Un tabata di airsoft di plèstik i e otro ta di gas ku e ta uza pa yag yuana.

Pa loke ta trata e akusashon, e akusado a bisa ku esaki no ta kuadra ku el a violá e dama, pero ta un “make up” sex nan a hasi.

Hues a revelá ku e señora a hasi denunsia di maltrato i violashon kontra e akusado. E tabata “byside” di e akusado pa 2 aña.

E dia ei e akusado a bai serka dje i huntu nan a sinta bebe “rum coke” riba balkon.

Segun e akusado, nan a kuminsá bebe for di 8 or di anochi te ku 12’or pasá. El a bai kas mitar di 5 di mainta.

Hues a sigui bisa ku dado momento segun e denunsia di e dama, e kombersashon entre nan a bira basta fèrfelu i a sali for di man.

E akusado a splika ku e ta un músiko i semper e dama tabata papia malu di algun músiko.

E tabata bisa ku e nunka por tin kontakto ku e tipo di e hendenan ei, paso nan ta hasi brua i ta mal hende. Segun e akusado, un dia el a subi e dama su FaceBook i mira ku e mesun hendenan ku e ta papia malu di nan, e tin kontakto ku nan den su FaceBook.

E dia ku el a bai serka e dama, el a puntr’e kon bin e tin e hendenan ei den  su Facebook. A surgi un diskushon entre nan di kual  e dama a pidié pa bai su kas, pa despues kana bai den kamber.

E akusado a kana bai den kamber su tras ku un kuchú i a dal e dama un moketa den su kara.

Despues e akusado a bent’é riba kama, habri su pianan i bis’é ku e no ta bai, sin tene relashon seksual kuné.

Segun e víktima e hòmber a viol’é for di 12 or di anochi te ku 5 or di mainta. Miéntras e tabata maltrat’é i dal’é kabisá.

Riba fotonan por a mira ku e víktima tabatin wowonan blousá, mannan hinchá i kap na su frenta.

E akusado a ninga tur esakinan. El a akseptá si ku el a dal e dama kabisá pero no manera el a bisa.

Hues den su veredikto a duna di konosé ku e ta haña e loke ku e akusado a hasi meresé mas kastigu di loke fiskal a pidi, mirando e fotonan di e dama kon el a keda i tambe e trouma ku el a laga tras serka e dama. P’esei e ta kondená e akusado na 5 aña enbes  di e 4 aña ku fiskal a pidi mas 4 mil florin di daño perhuisio.