WILLEMSTAD.- E konosido hóben Shaidrilon Mutueel mester a presentá ayera den sala di korte. Muteel ta keda akusá pa instigá i destrukshon durante   e manifestashon i sakeo ku a tuma lugá dia 24 di yüni 2020. Riba e dia en kuestion Kòrsou a konosé un página skur. Ta trata di un manifestashon pasífiko ku a sali for di Post 5 i a terminá den disturbio i destrukshon rònt Kòrsou. Tabata un bista tristu ku a keda atras na Kòrsou.

Manifestantenan ku mayoria trahadónan di Selikor a sali for di Post 5 guiá entre otro pa polis pa nan bai fòrti. Polis tabata sera kaya kada skina pa e manifestantenan a kana yega Punda. Te drentando Punda kos tabata trankil.  Na altura di marshe un grupo  a djòin e manifestantenan di kual mayoria trahadónan di Selikor. Dado momentu na Fòrti a sera e porta prinsipal, manifestantenan a disidí ku nan ke papia ku promé minister Rhuggenaath i mester habri e porta. Nan a basha e porta abou i a subi plenchi di Fòrti.

Dado momentu polis a lòs un tiru i einan manifestantenan a bira loko. Polis mester a tira gas pa saka e multitut for di Fòrti mirando ku a kuminsá destruí entre otro outo di minister. A saka nan pafó i a sigui pusha e grupo pa sake for di sentro di siudat. Durante di e trayekto ku e manifestantenan tabata Sali nan a kousa basta destrukshon.

A kibra tur baki di mata,  pega kliko nan grandi na kandela i a bòltu un outo di polis i pega esaki na kandela. Na mes momentu a kuminsá kandela aki i aya. A sende kasnan bashí den sentro di siudat na kandela, a kibra drenta den negoshinan i a piki kos bai kuné. A bai Saliña i a kibra den negoshinan. Mayoria tabata negoshinan di artíkulonan elektróniko. Tambe a bai Rooseveltweg i Sta Maria kaminda a kibra mas lugá di artíkulonan elektróniko.

A kibra bentananan di konvoi di ABC. Miéntras tantu polis a hasi un kantidat di detenshon en partikular di hóbennan.A haña hóbennan den outo ku kantidat di telefòn hòrtá. Mas anochi den oranan lat a pone man tambe riba Mutueel, ku tabata un di e lidernan ku for di siman promé tabata protestá. E tambe tabata den Fòrti durante e protesta i a keda detené pa instigadó i provoká e disturbio i destrukshon.

Bosero polisial sr. Zwerwer a konfirmá pa EXTRA su detenshon e dia ei huntu ku dos otro persona mas.

Despues di algun dia Mutueel ta rekobrá su libertat, pendiente tratamentu di su kaso. Ayera su kaso mester a keda tratá pero su abogado mr Athena Sulvaran a pidi pa posponé su kaso, debí ku Mutueel aktualmente no ta na Kòrsou.

Korte a bai di akuerdo i e kaso lo kontinuá dia 17 di mei binidero pa 2 or di mèrdia.