Sobrá por a buska na kranshi

WILLEMSTAD.- Na 2021 a logra entregá 97 porshento di tur karchi di vota. Tabatin apénas 3.362 karchi di vota ku no a logra entregá na kas serka e votadó. Di esakinan 1.868 persona a bai buska nan karchi di vota na kranshi.

Asina sekretario di Konseho Supremo Elektoral, Sheryl Losiabaar a informá parlamento. “Produkshon i repartishon di karchi di vota ta tuma lugá a base di informashon den e registro di votadó ku ta sera 24 desèmber 2024. Nòmber, fecha di nasementu, number di identifikashon, adrès i number di urna ta riba e karchi”, Losiabaar a sigui bisa.

Konforme lei e votadó mester risibí su karchi por lo ménos 8 dia promé ku elekshon, pero den hopi kaso na Kòrsou e votadó tin su karchi simannan adelantá, esta Losiabaar a indiká. E ta bisa ku KSE ta laga distribuí e karchi di vota via CPost den brivenbùs di kas. Tambe tin algun grupo privá ku ta bai den resortnan pa hasi esaki.

Komo ehèmpel el a bisa ku na 2021 a logra entregá 97 porshento di tur karchi di vota. Problemanan ku ta topa kuné ta entre otro ku un karchi ta bini bèk sin motibu. Tambe tin karchi ku no por entregá pasobra no sa e adrès di e votadó pasobra por ehèmpel el a muda sin registrá su adrès nobo. Na 2021 a registrá 709 di e kasonan aki.

Tambe ta dal den kasnan ku no tin buzon pa karta (“brievenbus”) i ku no tabatin hende na kas pa risibí e karchi di vota òf kaminda kachó ta stroba. Na 2021 tabatin 2.089 di e tipo di kasonan aki. Alabes tabatin 168 kas ku no habitá mas i tambe 255 karchi di vota ku no por a entregá pasobra e adrès di e votadó no tabata konosí. Finalmente tabatin 14 kaso di personanan ku a fayesé.

Segun Losiabaar a informá tabatin pues un total di 3.362 karchi di vota ku no a logra entregá. Di esakinan 1.868 persona a bai buska nan karchi di vota na Kranshi. Pues ta solamente 1.494 na kranshi i 1494 no a buska nan karchi di vota na Kranshi. “E grupo di votadó ku ta kai den e kategoria ‘adrès deskonosí’, KSE ta duna nan un urna spesial pa vota ku ta e urna na Sta. Famia, pasobra e ta mas serka di Kranshi. Nan ta buska nan karchi di vota i bai vota einan mesora.”

Mas aleu Losiabaar a duna algun informashon general mas. Presupuesto pa elekshon 2025 ta 2.597.200 florin. A risibí 2 mion florin kaba di gobièrnu. Kampaña di konsientisashon riba derecho di voto i kon ta vota ta forma parti di e tareanan di KSE. Esaki ta banda di e organisashon general di elekshon na 2025.

KSE ta responsabel pa henter e proseso elektoral, pues órden den urna, kordiná opservadónan internashonal, aksesibilidat na urnanan pa tur hende, determiná resultado di elekshon i determiná i nombra miembronan nobo di parlamento. Fechanan importante ta: 24 desèmber ku ta dia ku ta sera registro di votadó i ta sa kantidat eksakto di hendenan ku por bai vota. Ta trata di tur hende ku nashonalidat hulandes, inskribí na Kòrsou i tin 18 aña òf mas riba dia di vota. 23 di yanüari ta entrega di lista entre 9 or di mainta i 4 or di atardi.

Dia 1 i 2 febrüari ta dianan pa sostené lista durante un pre elekshon. Esaki ta pa tur partido ku ke partisipá na elekshon na mart 2025 pero ku no tin representashon den parlamento n’e momentonan aki. E partidonan aki mester haña 848 voto pa por partisipá na elekshon di 21 mart 2025.

Foto:

...Sheryl Losiabaar...