ORANJESTAD - Djadumingu pa 8:44 di mainta Sentral di Polis ta wòrdu notifiká cu na St.Regis Hotel un persona lo mester a kai di balkon i no ta duna señal di bida.  Sentral di Polis a manda polis i komo tambe ambulans na e sitio menshoná. Na yegada di e unidat di polis enberdat nan a topa un hende hòmber ku no ta duna señal di bida.

Personal di ambulans no por a hasi nada mas pa ku e persona. Ta trata di un turista hende hòmber nashonalidat merikano. Reshèrshi, polis tékniko, dr forensiko i departamento di slachtofferhulp a presente na e sitio.

Investigashon hasi ta indiká ku e víktima a bula for di e piso mas haltu di e hotèl i asina a bin na fayesé. Polis i personal di hotèl a bay kontrolá e kamber di e víktima i a bin enkontra un dama ku tampoko ta duna señal di bida. Ta trata aki di e kasa di e víktima.

Un kaso lamentabel i inusual i Kuerpo Polisial Aruba ta manda palabra di kondolensia na famia di e defuntunan. E kaso ta bou di investigashon di outoridatnan konserní i no tin mas detaye.(NoticiaCla)