KRALENDIJK – KPCN a aktua severo kontra algun polis ku, den nan tempu liber, a violá e medida di ‘lockdown’ diktá pa gezaghebber. Nan a kere ku nan por a sali riba kaya durante e orario di ‘lockdown’. A duna nan but interno. Resientemente tabata tin diferente keho den media relashoná ku falta di konfiansa den e kadena hudisial na Boneiru. E mensahenan aki ta relashoná ku tantu kasonan bieu komo kasonan andando interno i kasonan penal. Kuerpo Polisial Hulanda Karibense ta traha bou di supervishon di Ministerio di Hustisia i Seguridat (Ministerie van Justitie en Veiligheid), Atministradó di Kuerpo (Korpsbeheerder), Triángulo i Ombudsman Nashonal. I similar na otro kuerponan den region i na Hulanda ta sigui prosedura i lei den su trabou. E leinan aki ta brinda tantu komunidat komo partnernan den e kadena hudisial guia pa loke ta trata nan trabou i ta protehá prosesonan.

Na momentu ku realisá un keho relashoná ku akshon di un polis semper tin un investigashon interno. E investigashon aki ta unu amplio i den kaso ku ta trata un echo kastigabel pa lei OM lo huzga esaki. Ora konkluí e investigashon aki, lo papia ku e kolega konserní i eventualmente e ta haña sanshon konforme e Kódigo di Ámtenar òf Kódigo Penal. Trahadó semper por apelá esaki. Asina a parti vários but interno pa polisnan ku a violá e lei di emergensia durante ‘lockdown’ den nan tempu liber. Hefe di Kuerpo Polisial ta di opinion ku tur hende mester tene nan mes na mesun regla, espesialmente polis ku mester ta un ehèmpel pa komunidat. KPCN semper ta duna ‘feedback’ na esun ku a entregá keho. Ora un persona a hasi denunsia kontra kuerpo polisial, Bureau Interne Zaken ta investigá e kaso promé. Despues ta konsultá ku Ministerio Públiko (OM) kende ta determiná si ta trata di un denunsia penal i si mester ehekutá esaki bou di nan supervishon. Den e kaso aki ta traspasá e kaso pa OM pa tratamentu. Den kaso eksepshonal, kaminda ta purba di prevení konflikto di interes, OM por disidí di hasi traspaso pa Prokurador General (PG). E PG ta e ‘supervisor’ di OM i e ta hasi petishon pa Rijksrecherche pa sigui trata e kaso. Durante transkurso di un kaso, no ta usual ku ta duna ‘update’, pa motibu di privasidat i pa e prinsipio di ta inosente te ora ku dikta e huisio final. OM ta komuniká tokante di esaki ora finalisá kasonan (despues di un sentensia). Kuerpo Polisial Hulanda Karibense ta tene e konfiansa ku komunidat di Boneiru, Saba i Sint Eustatius ta dun’é, na pechu. Ku e puntonan ariba menshoná Kuerpo Polisial konosé un areglo di keho, kaminda siudadanonan i organisashonnan por hasi uso di dje. E areglo aki ta hasi posibel pa entregá keho kontra komportashon di polis i/òf keho tokante e tratamentu di kasonan pendiente. Un entidat eksterno i independiente ta trata e keho i ta duna konseho na e Hefe di Kuerpo Polisial kende ta tuma un desishon tokante e komportashon. Dado kaso si e persona ku a entregá keho no ta satisfecho, e por apelá serka Nationale Ombudsman. Ku tur e prosedura- i leinan aki, kual konforme e rapòrt di mantenshon di lei últimamente, ta funshoná bon, KPCN ta purba di ta mas transparente posibel i siña for di eventual erornan.