Mary Ann B. dilanti hues pa ladronisia i froude

KRALENDIJK -- “Mi ke ta liber. Mi ke sinti e amor di mi famia.” Esaki tabata e último palabranan di Mary Ann B. den korte siman pasá. Ministerio Públiko a akus’é di ladronisia di tarheta di banko i froude. Tabata planiá pa atendé e kaso riba 13 di yanüari, pero esaki no a sigui pa motibu ku otro huisio a dura mas ku premirá. “Mester di sufisiente tempu pa por atendé bo kaso pues mi tin ku posponé”, hues mr. Edelenbos a bisa. Por a nota ku abogado mr. Anthony Nicolaas no tabata masha kontentu ku e desishon aki, pero el a bai di akuerdo pa atendé e kaso riba djabièrnè 15 di yanüari último.

Sèks kontra pago

Mary Ann a splika korte ku su trabou ta entre otro duna masashi erótiko i ku a kùr su práktika na Hulanda pa por ehersé e trabou aki. Nunka el a traha na Pachi ni Campo, pero independiente. “Mi klientenan tabata makamba i merikano i semper esaki a bai bon. Problema a kuminsá na momentu ku mi a duna servisio na boneriano i peruano”, B. a bisa. Segun e akusado, e ta inosente i ta algun kliente a ninga di pag’é pa su servisio. “No tabata mihó si bo a tuma sèn promé ku bo a duna servisio?”, hues a puntr’é. “Mi a kai den nan trampa. Nan a pidi mi pa konfia nan”, el a kontestá emoshonal.

Froude

Segun e prosèsverbal, B. a perhudiká e hòmber E. El a deklará ku B. a aserk’é pa sèn pa kuminda i tambe pa masashi erótiko na balor di $200. Despues e hòmber a ripará ku B. a hòrta su tarheta di banko i a lanta su sèn sin su pèrmit. Un otro kliente tambe a deklará ku el a bai hotèl ku B. pa un masashi erótiko. Despues e tambe a pèrdè tarheta di banko i B. a lanta sèn fo’i su kuenta. B. a nenga esaki. El a bisa korte ku e hòmber tabata ke sèks i esaki ta kosta 800 dòler. “E no tabatin sufisiente sèn, pues el a duna mi su tarheta i ‘pincode’ pa mi lanta e sèn”, tabata su splikashon.

Erekshon

Tambe hues a para ketu na e denunsia di un hòmber ku inisial O. Segun e akusado, esaki ta un kliente ku hopi sèn. El a palabrá ku e hòmber ku nan lo hasi sèks sin kondon pa e montante di 1200 dòler. Segun e akusado e kliente a nenga di pag’é pa motibu ku e no tabatin un erekshon, pues e no por a hasi sèks. E prosèsverbal ta bisa ku B. a perhudiká e hòmber aki pa un montante di mas ku 1500 dòler. “Mi a traha hopi duru, pero tòg e no a logra na haña un erekshon. Na final el a ofendé mi i kibra mi.” I un bia mas B. a bira bastante emoshonal den korte. Víktima 4 tambe a hasi denunsia di ladronisia kontra B. “El a paga mi pa un masashi erótiko. Mi tin duele di dje, pasobra su kabes no ta bon”, tabata e splikashon di e akusado. Remarkabel tabata ku Mary Ann a atmití di a kometé froude kontra R., un hòmber desabilitá. Segun e prosèsverbal, e akusado ku un amiga a bai kore keiru ku R. Na dado momentu R. a permití Mary Ann di swaip 90 dòler pa komestibel. Siguiente dia R. a nota ku B. a lanta 1000 dòler fo’i su kuenta i tambe ku falta 241 dòler. “Mi ta hasi mi mes kulpabel pa ku esaki i mi ke pag’é bèk. Ta duel mi, paso e ta mi amigu”, B. a deklará emoshonal. El a nenga di sa algu di e 241 dòler. Fiskal a aklará ku Ministerio Públiko no ta para ketu na e tipo di trabou di B., pero problema ta e sistema froudulento ku el a kita sèn for di e hòmbernan. Riba 13 di aprel 2021 Korte den Promé Instansia lo sigui atendé e kaso aki.