WILLEMSTAD. - Kòrsou konosé pa hopi aña un problema ku herensianan indiviso, hopi biaha ta trata di kas i tereno. Esaki a pone ku na aña 2007 a introdusí e lei “langdurig onverdeeld gebleven gemeenschappen” kaminda ku artíkulo 3:200a te ku 200h di e Kódigo Sivil ta regla e problemátika menshoná. E lei aki ta trese e posibilidat ku e personanan ku ta di opinion ku nan tin derecho riba sierto herensianan, pa despues di hopi aña, tòg regla esaki. Hopi biaha tabata e problema ku no por ni saka afó mas ken tabata doño i òf ken tur ta heredero. Aki na Kòrsou tin barionan kompleto ku no por saka afó mas ken tur ta heredero.

Pa loke ta trata e kaso spesífiko aki ta un kas situá den Quintastraat 37. Ta un kas ku a keda konstruí na aña 1897. E doño di e kas a nase na aña 1854 i a fayesé na 1933, e tabata sapaté i e tabata kasá ku un señora ku a nase na 1865. E pareha aki a haña 8 yu di kua mama di e persona ku ta bringando su herensia ta un di e yunan. E yu ku ta bringando e herensia a nase na 1933, esta e mesun aña ku e wela a fayesé.

Promé ku korte a trata e kaso aki, nan a publiká ku lo bai atendé e herensia di e kas enkuestion den korant Extra i Amigoe i riba website di Korte, kaminda ku nan ta hasi apelashon na posibel persona nan ku tambe lo por forma parti di e herensia. Pero esei no tabata e kaso. Niun hende no a reakshoná pa ku e kas aki.

For di 1970 e señora ku ta bringando su herensia tabata hür e kas aki ku tersera pa 50 florin pa luna, despues 100 florin i finalmente 150 florin pa luna. E kas su balor a keda kalkulá na 47.500 florin.

E echo ku e señora ta nieta di e doño i niun hende otro no a presentá den e proseso pa herensia, korte a konsedé e señora e propiedat enkuestion.

E kas ta riba e lista di Monumentonan, pues ta un propiedat protehá.