WILLEMSTAD.- “Na Kòrsou ta elogiá ignoransia. Pasobra un hende a studia mester atak’é. Ta einan nos ta bayendo.” Asina parlamentario pa partido PNP, Sheldry Osepa a remarká durante tratamentu di presupuesto 2025 den Komishon Sentral di parlamento.

Osepa refiriendo na e situashon di enseñansa ta papia di ‘abusu di un pueblo’ ku ta tumando lugá. Na opinion su opinion e grado di populismo den polítika na Kòrsou ta hunga un ròl riba e nivel di formashon. “E nivel di populismo ta importante ora ta papia di forma hende. Mas bon e hende su formashon ta, ménos reseptivo e ta pa populismo.”

Osepa ta kere ku konsientemente ta keda sin forma hendenan pa tene nan ignorante pasobra ta mas fásil pa dominá un persona ku no a desaroyá su mes. E ta mustra mas aleu ku formashon di un pueblo den desaroyo ta importante i ántes tabatin polítikonan di kaliber manera Don Martina i Maria Liberia-Peters tabata un modelo pa poblashon. “Awendia ora bo wak e polítikonan bo ta puntra bo mes ta manera kua di nan lo mi ke ta?”

Alabes e ta bisa ku den pasado polítikonan tabata hasi esfuerso pa krea funshonarionan mas haltu (“kader”) i tabata sòru pa duna yunan di tera fiansa di estudio pa bai studia i regresá Kòrsou pa traha. Despues di traha 5 aña pa pais tabata kanselá nan debe di estudio.

Aworakí, segun Osepa, hóbennan ku bai studia afó no ta bini bèk Kòrsou pasobra no tin e tipo di insentivonan aki pa nan. “E muchanan ta bai studia ku fiansa na DUO i nan no ta bini bèk. Nan ta keda Hulanda i gana euro, pasobra finansieramente no ta atraktivo pa nan bini traha bèk na Kòrsou.”

Loke segun Osepa mas tristu ta ku, apesar di tur e kosnan ku polítikonan ta papia, nan yunan si ta bon studiá miéntras yunan di sobrá di poblashon ta den e 50 porshento ku no ta haña un bon edukashon. “Ta un abusu loke polítikonan ta hasi ku enseñansa i yunan di hende. Baha kantidat di ora ku ta haña sierto materia manera Hulandes na skol, ku ta materianan ku hustamente ta yuda den formashon di hóbennan.”

Foto:

...Sheldry Osepa...