WILLEMSTAD.- Apesar ku parlamento no a risibí informashon previo riba e akuerdo ku Refineria di Kòrsou (RdK) a firma ku e kompania Oryx Midstream, parlamentario independiente, Zita Jesus-Leito ta di opinion ku esaki no ta motibu pa bati e akuerdo kibra. Oryx Midstream pa próksimo 30 aña lo pa manehá instalashonnan na Bullenbaai i Emmastad pa importá, meskla i eksportá produkto petrolero.

Jesus-Leito ta splika ku el a bai e seremonia di firmamentu hustamente pa haña informashon. E ta mustra ku ta for di 2019 no tin nada ta pasando ku e refineria i ta pagando trahadónan sin ku tin un operashon ku ta sòru pa entrada regular.

“Aworakí a yega na algu i mi ta kere ku no mester bai kritiká i bati esaki kibra, ounke ku parlamento no a haña informashon riba loke a firma. Tin algu i mi opinion ta pa ban move riba esaki pa wak al final kiko por logra hasi ku e refineria.”

Jesus-Leito ta bisa mas aleu ku e tin e intenshon pa hiba kòmbersashon ku lidernan sindikal tambe riba e kontrato. “Mi por a tende ku e sindikatonan PWFC i APRI ku a pidi pa duna espasio pa finalisá e detayenan pa operá e fasilidatnan na Bullenbaai i Emmastad i  yega na transishon suave di e personal. Di otro banda tin organisashonnan sindikal ku a mustra ku falta hopi informashon ainda i nan tin hopi interogatorio riba e kontrato ku a firma.”

Ta den e kuadro aki Jesus-Leito ta bisa ku e ta kere ku ta na su lugá pa asina ku reseso di parlamento pasa pa yama un reunion i duna parlamento informashon. Pa yama e reunion den reseso segun e parlamentario independiente no tin sentido pasobra vários parlamentario i mandatario no ta presente.

Riba komentarionan ku mester a firma e kontrato bou di e kondishon ku parlamento mester duna su aprobashon na esaki, Jesus-Leito ta bisa ku Kontrolaria General resientemente a splika bon kla den parlamento ku kompanianan di gobièrnu no mester di aprobashon di parlamento promé firma akuerdonan. “Pues nos ta sintá ku un echo ku a tuma lugá.”

E parlamentario ta sigui bisa ku por tuma nota ku ta rònt Karibe refinerianan a sera, pero tòg a primintí durante kampaña na 2021 ku lo habri e refineria di Kòrsou sin ku por a kumpli. “Esaki ta fèrfelu.”

Finalmente Jesus-Leito ta opiná ku den kualke akuerdo final ku yega na dje, no por ta asina ku ta duna tur e terenonan di e refineria na e operadó nobo. “Tin hopi tereno por por usa pa otro aktividat i pa e motibu aki ta bon pa duna parlamento mas informashon di detayenan di e akuerdo ku a yega na dje i kiko e plannan pa futuro ta.”

Foto:

...Zita Jesus-Leito...