WILLEMSTAD.- Na mitar di reunion públiko ayera, parlamentarionan Jacinta Constancia i Marilyn Moses a baha ai. Esaki despues ku nan a sorprendé nan koleganan di “koalishon” den parlamento ku nan presensia i asina yuda forma quorum pa trata algun punto di agènda. Tabatin kuater punto di agènda, entre otro un lei “vaststellingsovereenkomst” entre Gobièrnu di Kòrsou i Fundashon Kas Popular; e di tres punto di agènda tabata Tratamentu di karta di Kontraloria General Kòrsou fechá 30 di desèmber 2020 enkuanto proposishon di kandidato pa presidensia di Kontrolaria General di Kòrsou.; 4. Ratifikashon di e “ministeriële regelingen met algemene werking 2021 no. 5 i 9” konforme e Lei Estado di Emergensia.
Despues ku e dos parlamentarionan Constancia i Moses a kaba di vota p’e punto di agènda di FKP, nan a baha bai. Pone ku no por a trata e punto di agènda 3 i 4.
E di tres punto di Kontraloria General (KG) ta pa trata un karta di 30 desèmber 2020 di posishon di kandidato di Kontraloria General. KG ta hasi proposishon pa nombra sr. Vriend komo miembro i presidente di KG Kòrsou i manda e proposishon na gobernadó. Sinembargo ora mester a trata e punto aki i vota riba dje, presidente di parlamento sra. Ana Maria Pauletta a pidi miembronan pa sende nan kámara nan. Pasobra tabatin 12 miembro presente durante e reunion virtual, pero e momentu ei e tabata mira 9 miembro so. A disidí di “konta kabes” a resultá ku sra. Constancia i sra. Moses no tabata presente ku konsekuensia no tin sufisiente miembro manera e reunion a kuminsá mainta i presidente mester a suspendé e reunion pa falta di quorum te próksimo aviso.
Ayera nochi Parlamento a aprobá e “vaststellingsovereenkomst” entre Gobièrnu di Kòrsou i Fundashon Kas Popular (FKP). Pa añanan Fundashon Kas Popular (FKP) tabatin un claim riba Gobièrnu di Kòrsou, kual a kuminsá akumulá for di aña 2001. Esaki tabata a base di e retraso di pago di tantu e montantenan pa mantenshon di kasnan bou di maneho di FKP i e supsidio di hür ku FKP ta duna na su klientenan. Riba petishon di Minister di Finansa na aña 2014, SAOB a hasi investigashon i saka un rapòrt den kual e claim a wòrdu adaptá, despues di un proseso di komparashon ku FKP. A base di esaki a kuminsá traha riba e “vaststellingsovereenkomst” i akuerdo di maneho, na aña 2017, riba insistensia di aktual Minister di Tráfiko, Transporte i Planifikashon Urbano, señora Jesus-Leito (VVRP).
E “vaststellingsovereenkomst” ta stipulá altura di e debe atrasá di Gobièrnu pa ku FKP, durante e proseso largu aki a logra baha e claim di kasi 100 mion na e montante final di 13.5 mion. Esaki a keda pone den un lei ku a pasa Parlamento ayera kual miembronan di Parlamento a vota riba dje. E resultado final di hinter e proseso aki ta, ku un claim haltu a ser rektifiká i lo no tin influensia mas riba presupuesto di Gobièrnu komo un faktor di rísiko.
Awor lo sigui pa firmamentu di un akuerdo di mantenshon i maneho di supsidio entre FKP i Gobièrnu di Kòrsou. E akuerdonan di maneho i di supsidio aki lo sòru pa un relashon fiho entre Gobièrnu i FKP, kaminda e konsekuensianan finansiero ta premirá.
E akuerdo di maneho ta fiha e guia i kriterionan pa mantenshon di e kasnan dor di FKP i ta ser regla dor di Ministerio di VVRP. Tambe lo hasi un investigashon pa asina midi e kondishon aktual di estado di e kasnan di FKP. Esaki ta bira e normanan di prestashon di parti di FKP pa ku maneho i mantenshon di e kasnan di Gobièrnu. E maneho di supsidio ta wòrdu regla dor di Ministerio di Desaroyo Sosial i Asuntunan Laboral (SOAW) i ta enserá e kondishonnan ku FKP mester kumpli kuné pa por risibí esaki.