SABA.- Sektor di hospitalidat di Saba a keda informá ayera ku djaluna dia 22 di febrüari ta kuminsá vakuná.

Den kurso di otro siman, Saba lo risibí e promé set di vakuna COVID-19 di Moderna. Lo tin dos rònt di vakunashon. E promé lo ta den e siman di 22 di febrüari pa 1 di mart i e di dos lo ta den 22 di mart pa 290 di mart, asina gezaghebber Jonathan Johnson a informá e sektor di hospitalidat den un karta ayera.

Na fin di aprel lo tin un momentu chikí pa e grupo di hende ku no lo a logra vakuná den e promé dos ròndunan, por ehèmpel debí ku nan tabata pafó di e isla pa motibunan médiko òf pasobra nan tabata na estado.

A pone e fecha di 1 di mei  pa habri bèk, pero tur kos ta dependé di e kantidat di persona ku laga vakuná nan mes. Te ainda 1140 persona a registrá. Ta konsentrá e strategia di reapertura basá riba e porsentahe di adulto ku ta kai den e rísiko òf personanan vulnerabel ku a tuma e vakuna. Esaki pasobra kualke medida ku tuma òf kita lo tin impakto grandi riba netamente e grupo ei.

“Ounke ku e kantidat di registrashon ta indiká ku nos ta riba e bon kaminda pa vakuná e grupo grandi di adulto na Saba, nos no tin niun idea definitivo kua medida nos lo implementá pa e próksimo fase di reapertura, te ora a kaba ku e promé ròndu di vakunashon. Nos por bisa di ta spera ku lo no tin mas obligashon di karentena pa biaheronan ku ta yega e isla i ku a keda vakuná. Nos por bisa si ku e tèstmentu lo kontinuá por lo pronto pa tur biahero ku ta drenta inkluyendo esnan ku a tuma e vakuna”, segun e karta ta bisa.

Te ku djabièrnè e kantidat di persona ku a registrá pa vakuná ta 1140, ku ta un subida den último simannan. Gezaghebber  a bisa ku tur hende por ta orguyoso di esaki pero tòg e ta enkurashá esnan ku ni a registrá pa hasié. Ta importante pa registrá pa asina e tim médiko por tin e tempu i informashon pa un plan adekuá.