WILLEMSTAD. - For di djabièrnè tras di lomba agentenan di Direkshon Nashonal di Kontròl di Droga (DNCD) huntu ku otro agensianan uniformá di Sto. Domingo a logra arestá un grupo formal di persona di nashonalidat dominikano, venezolano i tambe arubiano.

Tur kos a kuminsá ku interseptashon di un lancha. E lancha tabata di 32 pia i tabatin dos potente motor di kada un 200HP (forsa di kabai).

Despues di e arestonan aki, e investigashon a kontinuá a bai mas leu.

Den presensia di Ministerio Públiko, e tim di DNCD a drenta den un kas i einan a interseptá basta kos i a arestá un rubiano femenino. E loke ku a hala atenshon den e loke ku a keda tumá den beslag ta telefònnan ku ta konektá via satélite, tabatin GPS den e kas, ekipo di buseo i vários vehíkulo etcetera.

Despues e investigashon a sigui na un otro sitio, kaminda ku segun informashon ku e tim investigadó a optené, lo mester tabatin kargamentunan tumando lugá i akinan ora ku e individuonan a tuma nota di presensia di agentenan di DNCD, a start un tiramentu. E informe di DNCD no ta hasi menshon di niun herido.

Despues di e interkambio di tiramentu aki, polis huntu ku Forsanan Armá i tambe Agensia di Inteligensia, a logra arestá basta individuo.

Na total a konfiská 897 pakete ku ta kontené kokaina.

E operashon aki tabata den kooperashon ku forsanan aéreo, marítimo, tim anti narkótika i forsanan armá.

E operashon a tuma lugá na kosta di e munisipio Baní, Provinsia Peravia.

Manera informá e arestonan ku a tuma lugá despues di e tiroteonan tabata venezolanonan, dominikanonan i arubianonan.

Henter e operashon a tuma lugá bou di kordinashon di Ministerio Públiko.