Kòrsou pendiente nulmeting

DEN HAAG.-E gabinete ulandes demishonario di Mark Rutte a destiná 360 mion euro spesialmente pa enseñansa, repartí den e próksimo tres añanan. 100 mion euro lo ta destiná pa mehorashon di ventilashon na skolnan. E fondonan aki ta Sali for di un pochi ku lo ta disponibel te 2023, asina e minister demishonario Arie Slob enkargá ku enseñansa a duna di konosé.

E invershonnan pa drecha e aspekto ambiental den skolnan mester kontribuí pa pone ku corona vírus por plama ménos lihé den skolnan. For di Den Haag ta informa ku tin asina tantu interes pa bini na remarke pa haña fondo di 100 mion euro aki ku promé ku verano ya kaba kasi tur e plaka a kaba.

Miembronan di Tweede Kamer di GroenLinks i PvdA a proponé pa los e parti sobrá di e plaka for di tempran. Un mayoria den Parlamento ulandes a sostené e proposishon.

Minister Slob ta kere ku e èkstra sèn ku tin pa 2021 lo por yuda pa kumpli ku tur e petishonnan ku a keda entrega pa e promé mitar di aña.

Na Kòrsou e minister nobo, meskos ku e último minister di Enseñansa, a pidi pa hasi un ‘nulmeting pa haña un indikashon detayá di e situashon di enseñansa. Resientemente e minister nobo a bisa ku e ta spera di haña e ‘nulmeting’ pa oktober próksimo. Enseñansa ta den gran nesesidat, sinembargo kontinuamente ta kòrta den fondonan loke ta hinka e sektor den situashonnan serio i ku retonan grandi pa dil kuné.