WILLEMSTAD.- Polis ta pidi búskeda di un hòmber di 36 aña ku a sali su kas for di djamars pasá i e tabata sunú.  Den e kuadro aki ayera tabatin un búskeda basta grandi di Cusar huntu ku outoridatnan den área di Hato, Souax i Seri Kandela.

Polis ta informá ku ta pidi búskeda di e hòmber Eudys Coster, nasé na Kòrsou di 36 aña di edat. Djamars 7 di mei 2024, pa kuartu pa 5 di mardugá e hòmber aki a sali kas den área di Kaya Shilling na Seri Kandela, i no a regresá bèk.

Eudys tin e siguiente deskripshon:

Haltura: 1.65 m;

Postura: balente;

Forma di kara: oval;

Kabei: maron skur kòrtiku ku flèktu patras;

Koló di wowo: maron;

Koló di kueru: maron kla;

Sikatris : parti robes di su nanishi

Na momento ku Eudys a sali kas e no tabatin paña ni sapatu bistí.

Na su garganta parti robes e tin un tatuahe ku e palabra “Eudys”.

Polis ta supliká tur persona ku por duna kualke informashon tokante di e hòmber aki pa tuma kontakto ku polis na number di telefòn 917 òf e number anónimo 108.

Manera EXTRA a informá, ayera i posiblemente awe tambe ta buskando e hòmber aki. Cusar (Caribbean Urban Search and Rescue) ku ta e tim di reskate huntu ku polis i diferente otro persona mas a kuminsá ku un búskeda di Eudys. Cusar tin ekiponan ku nan ta hasi uso kuné den búskeda. Den e kaso aki ayera a buska pero te ainda no a logra haña e hòmber pèrdí. E búskeda lo sigui den e dianan aki.