Situashon di medio ambiente ainda un problema

WILLEMSTAD.- For di 4 diferente fuente ta indiká na redakshon di EXTRA a risibí informashon ku ainda e situashon rondó di Global Oil no ta kana manera mester ta. Apesar ku via e sindikato SGTK a sali informashon ku mester di mas personal lokal pa traha riba trabounan ku ta bai habri pa hasi revishon di plantanan, por komprondé ku e situashon rondó di preparashon pa operá e plantanan pa produsí asfalt ta pegá.

Un di e motibunan prinsipal pa esaki ta e situashon ku pèrmitnan ku mester haña relashoná ku medio ambiente. Apesar ku a pasa un lei nobo relashoná ku normanan di medio ambiente mará na aktividat di refinashon, esaki lo no ta duna sufisiente siguransa pa Global Oil dal bai ku e proyekto.

EXTRA no a logra haña un representante di Global Oil pa averiguá e informashonnan aki, pero ku insistensia por komprondé ku no tin mashá trabou ta tuma lugá aktualmente. Tambe a trata di drenta den kontakto ku direktor di Refineria di Kòrsou (RdK), Patrick Newton, pero no a logra haña kontakto di su banda tampoko.

Por komprondé mas aleu ku a surgi problema ku un “comfort letter” ku mester duna e siguransa ku partidonan ta kumpli ainda ku e kondishonnan di e akuerdo ku a sera for di yüni 2023. Global Oil lo no ta dispuesto pa aseptá e karta aki hustamente debí na falta di klaridat rondó di aspektonan di medio ambiente.

Na yüni 2023 Refineria di Kòrsou (RdK) a firma kontrato ku Global Oil Management Group di 5 aña pa entre otro produkshon i eksportashon di Asfalt. Global Oil mester a kuminsá ku preparashon di e instalashonnan nesesario pa operashon. Na ougùstùs 2023 direktor di RdK, Patrick Newton a bisa di ta spera ku den luna di sèptèmber 2023 lo start ku destaho pa kontratistanan por kuminsá traha riba tereno di refineria.

A kuminsá limpia terenonan, i tambe tankinan ku Global lo bai usa. Speransa ku den e promé kuartal di 2024, Global ta kuminsá funshoná. Na febrüari 2024 ceo di Global Oil, Harry Sargeant a informá ku e meta prinsipal a keda, ku na luna di mei 2024 lo kuminsá ku e operashonnan riba terenonan di refineria Isla pa prosesá petroli tantu pa eksportashon komo pa suministrá merkado lokal di asfalt. El a splika alabes ku Global Oil lo risibí krudo di Venezuela a base di e “settlement agreement” entre PdVSA i RdK riba pago di e debe.

Na ougùstùs 2024 Global Oil a wanta ku tur akshon te ku promé di sèptèmber. Esaki a base di un disputa ku a surgi riba suministro di èkstra kapasidat na Aqualectra den temporada ku esaki ta nesesario pa satisfasé e demanda di koriente na Kòrsou tur momentu di dia. Den e akuerdo di  yüni 2023 RdK a sera un akuerdo di hür ku Global Oil kaminda ta otorgá e kompania e derechonan pa operá, entre otro, e unidatnan GT9 i GT10 pa produkshon di koriente ku ta nesesario pa Global Oil su produkshon di asfalt na Emmastad.

Dia 12 di sèptèmber 2024 Aqualectra i Global Oil a firma un akuerdo riba e suministro temporal di koriente na Aqualectra te ku final di 2024. A kombení tambe ku e dos partidonan lo sigui negoshá ku otro te, mas tardá, final di 2024 riba un akuerdo nobo pa kompra di koriente (“power purchase agreement”)  di Aqualectra serka Global Oil pa e añanan 2025 i despues.

Awor sinembargo informashon ta drenta ku ketu bai e trabounan pa start produkshon di asfalt no ta kana manera mester ta i ku e situashon ta ‘mal pegá’.