...Formashon di gobièrnu stabil lo no ta fásil...

PHILIPSBURG- Manera antisipá National Alliance (NA) a sali e gran ganadó di elekshon ayera NAN St. Maarten. Nan a saka 6 asiento despues di a risibí 4.694 voto. United People’s Party (UPP) a saka 4 asiento a base di 3.232 voto risibí. E gran sorpresa, Party For Progress (PFP) i United St. Maarten Party (UsP) a saka 2 asiento. United Democrats a logra saka 1 asiento miéntras ku partidonan People’s Progressive Alliance (PPA) i St. Maarten Christian Party (SMCP) no a logra saka asiento.

Mirando lasonan polítiko históriko na St. Maarten por sali for di e punto di bista ku NA i UsP lo negoshá un gabinete. Sinembargo esaki ta sostené riba un mayoria smal di 8 di e 15 asientonan den parlamento. NA a kore un kampaña kontra e instabilidat polítiko ku e eks koalishon formá pa UPP i UD tabata representá i no por spera pues ku e partido lo aserká ni UPP ni UD pa forma un gobièrnu nobo.

Ta keda PFP komo opshon pa amplia base di un posibel koalishon ku ta konsistí di NA, UsP i PFP. E koalishon aki ta gosa di un sosten di 10 asiento den parlamento. PFP a primintí un polítika nobo pa St. Maarten lòs for di e práktikanan tradishonal.

Sinembargo t’asina ku tata i konsehero di lider polítiko Melissa Gumbs di PFP, Marcel Gumbs tin rekuerdonan amargo tempu e tabata promé minister i NA den oposishon a traha duru pa a tumba su gabinete. Tambe e resultadonan individual di elekshon ta lanta interogatorio riba e proseso di formashon.

Lider polítiko di UsP, Frans Richardson no a saka sufisiente voto pa drenta parlamento. Manera ta konosí na St. Maarten t’asina ku e kandidatonan ku mas tantu voto riba lista ta drenta parlamento.

Pero e konfiansa entre NA i UsP ta primordialmente den e personanandi William Marlin di NA i Richardson di UsP ku ántes pa hopi aña largu tabata lider polítiko i lider polítiko suplente di NA. Sin Frans den parlamento e konfiansa aki ta haña un sla fuerte.

Caludius “Toontje” Buncamper ku si lo drenta parlamento pa UsP tambe ta un persona di konfiansa ku NA por traha kuné, pero kon number 10 riba lista, Akeem Arrindell ku tambe ta drenta parlamento pa UsP a base di e kantidat di voto personal ku el a haña, lo komportá su mes no ta algu ku ni UsP ni NA tin grep riba dje.

E echo ku na St. Maarten ta usa e sistema ku kandidatonan ku mas voto personal ta drenta parlamento, i no ta wak voto preferensial i despues sekuensia di lista, a okashoná un situashon kaminda polítikonan ku drenta den parlamento ta duna nan mes un poder enorme pa eksigí un kantidat di kos anto no nesesariamente ta tende di liderato di partido. Mas bien ta tende di esnan ku a finansiá nan kampaña personal.

Ta den e kuadro di aki NA mester studia e posibilidat pa amplia e base di e koalishon i trata na hinka PFP tambe den gobièrnu. Tambe NA mester tene kuenta ku UPP tambe lo hasi intento pa aserka partidonan UsP, PFP i UD pa huntu forma un koalishon ku un sosten di 9 asiento lagando NA den oposishon.