Koalishon aktual por sigui goberná

PHILIPSBURG - Den elekshon pa un parlamento nobo di Sint Maarten ku a tuma lugá djaluna 19 ougùstùs shete partido a haña un òf mas asiento. Un resultado hopi diversifiká. Tres partido a saka tres asiento kada un.
E resultado preliminar ta mustra ku National Alliance (NA) di eks promé minister, Silveria Jacobs a risibí mas voto (2264), sigui pa URSM di aktual promé minister, Luc Mercelina ku 2239 voto i Partido Demokrátiko (DP) di lider Sarah Wescot-Williams a haña 2069 voto. Ta notabel ku Jacobs (56), ku a sirbi komo promé minister di dos gabinete entre 2019 i 2024, no a haña sufisiente voto pa drenta parlamento.
Na e momento aki Sint Maarten ta konosé un koalishon demishonario ku ta konsistí di partidonan URSM, DP, PFP i NOW. E koalishon, ku e resultado nobo por sigui goberná. URSM tin 3 asiento, DP tin 3 asiento, PFP tin 2 asiento i NOW tin 1 asiento.
E úniko partido nobo ku a gana un asiento ta SAM di èks parlamentario Franklin Meyers. E partido OMC di Olivier Arrindell no a risibí sufisiente voto pa un asiento. Arrindell a sali den notisia luna pasá ora ku a basha bala riba su outo ku resultado fatal pa su kompañera di bida ku tabata huntu kuné den outo na e momentonan ei.
Pa e elekshon, Sint Maarten a buska yudansa di polis di Kòrsou, Aruba i islanan BES ku tabata presente riba kaya. Komo konsekuensia tabatin un presensia fuerte di polis, pero no a reportá insidentenan grandi.
Urna a sera djaluna anochi 8’or pero a dura te djamars 20 ougùstùs 4’or di mainta promé ku a kaba di konta tur votonan i anunsiá e resultado preliminar. Un total di 60 porshento di e votadónan a hasi uso di nan derecho di voto i a konta un total di 13.964 voto bálido.