Víktima ta manda mensahe pa e otro pa bis’é e tin kos

WILLEMSTAD. - Ayera Korte a trata kaso dòbel asesinato ku a tuma lugá dia 9 di febrüari 2019 riba Koraal Spechtweg. E dia ei pueblo di Kòrsou a keda di shòk ora ku a bira konosí ku dos persona a pèrdè nan bida, konsekuensia di arma di kandela.

E loke ku a sali na kla for di e  investigashon t’asina ku e hòmbernan Ingabriel “Gabi” Alberto i Thaino Mathilda ta sospechosonan prinsipal, den e kaso aki i tambe Renny Ocando Curiel.

Alberto i Mathilda nan karchi di kastigu ta pisá. Pa loke ta trata Alberto, e ta sitando un kondena di 20 aña pa kaso di asesinato ku a tuma lugá na altura “Libanesa” dia 2 di sèptèmber 2019, miéntras Mathilda ta sintando kastigu di 16 aña pa un kaso di atrako brutal ku a tuma lugá dia 31 desèmber 2017, na pòmp di gasolin Vanddis na wèg naar Fuik kaminda malechornan a kibra e ofisina di e pòmp ku un kran i bai ku e kaha di plaka.

Segun rapòrt di Instituto Forensiko na Hulanda (NFI), prueba di polvo di arma di kandela riba man, ku a hasi ku e akusado Renny Ocando Curiel (26), a sali positivo.

Curiel semper a para riba ku e no tin nada di aber ku e kaso i ta inosente. Ayera hues a bis’é ku sea el a mishi ku e kurpanan, òf tabata serka di esun ku a tira. Curiel a bisa ora el a tende tiru, el a kore bula muraya ta ora tur kos a pasa el a sali i mira e kurpanan.

Ayera Mathilda, Curiel, Alberto i Ocando tabata presente den sala di korte.

Tantu Alberto komo Mathilda a presentá bou di kustodia di e tim di aresto.

Hues a bisa ku riba e dia en kuestion aparentemente tabatin un negoshashon òf interkambio di arma ku a bai kompletamente robes i a kaba den dòbel asesinato.

No ta muchu kla si e víktima Regulo Jose Gomez-Hermoso tabata e kumprando òf e bendedó. Segun un verbalisante na momento ku nan a detené Curiel i hib’e SDKK, espontáneamente  el a bisa ku e mester a bai regla e asuntu di arma na un toko na Koraal Specht. Ayera Curiel a ninga esaki redondamente.

Hues a bisa na polis Curiel a deklará ku nan tabata na Katia snèk i e víktima Quami a drenta outo huntu ku de Lanoy.

Segun Curiel nan a bis’e pa ban bebe un serbes sin bis’é unda presis.

Regulo a yama Curiel dado momento i bis’é pa bisa Quami e tin e kos. Pero Curiel a bisa ku e no sa kiko Regulo tabata ke men ku e kos.

Hues a bis’é ku ta parse e  tabata intermediario entre Regulo i Quami.