....Pálufriu òf tambe masha bunita bisá “popsicle” ta loke Geric Sambo ta deleitá nos kuné. Ku sabornan úniko, sabornan trahá ku tambe frutanan di Kòrsou. Geric a bai studia na Merka kaminda el a bin ripará kuantu hende ta gusta kome pálufriu. El a bai studia pa bin Kòrsou bèk pero ora el a yega aki no por a haña trabou di loke el a studia p’e. Geric su estudio tabata di ministrá i tambe a studia den músika. Tambe el a siña den trabou ku hóben.

Geric a buska trabou basta i a kòrda bèk riba e idea di pálufriu.

Dia 2 di mei di e aña aki Geric a disidí ku e ta kuminsá traha pálufriu pa bende. I ku e pálufriunan aki e ta sinti ku tòg el a keda den e área di hóbennan. For di momentu ku el a kuminsá e reakshon tabata masha bon i e ta sinti ku el a yena un bashí.

Trese memorianan bèk...

Antes tabatin e kompadernan tabata kana porta pa porta, den barionan sea ku e garoshinan ku e bèl na dje òf tambe den e vènnan. I awendia e tradishon ei a bai pèrdí. Masha poko por haña un kompader ta kore bende pálufriu i p’esei Geric ta sinti ku el a yega tòg e bashí ei ku su pálufriunan. E ta un nostalgia i ta trese memorianan bèk. I el a disidí di hasié apart, algu fresku, ful natural i e hendenan ta gust’é, Den prinsipio hende ta wak preis promé pero awor ta wak kalidat i servisio i ta aseptá e pálufriunan.

E pálufriunan di Geric ta keda bendé mas durante di eventonan. Su kompania ainda ta chikí i no ta pone den supermerkadonan ainda. E ke interaktuá ku e públiko, e ke sinti e reakshon di e hende ku purba e pálufriunan, e ke mira e goso riba e hende su kara, p’esei e ta keda awor aki na eventonan.

Produkto apart...

Geric ta konsiderá su produkto apart for di tur otro. Esaki pasobra e tin sabornan ta apart manera e kiwi strawberry, blueberry cheesecake, kual ta un sabor ku ora e bisa hende nan no por kere te ora nan purb’é. “Mi gusta tèst kos diferente i mi ta pensa ‘outside òf the box’. Mi ke hende pasa un aventura purbando mi pálufriunan. Mi mes ta traha e pálufriunan i pa yega na e produkto ta tuma su tempu”.

Perfekshoná....

Promé ku el a subi merkado, el a purba bastante.  El a hasi hopi investigashon, purba diferente resèpt i perfekshoná su produktonan. El a laga su famia i amigunan purba te ora e tabata satisfecho el a subi ku Popcultr. Pa el a yega asina leu a dur’e kasi 6 luna. El a kuminsá for di novèmber aña pasá te na luna di mei e aña aki el a subi merkado ku su produkto. Geric a konta ku e tabata trahando un partime job i tur dia e ta bin kas i hasi su investigashon te pa yega asina leu.

Lanta empresa ta difísil....

Pa a lanta un empresa aktualmente mentalmente ta difísil. E sa ku situashon na Kòrsou no ta masha bon pero e no kier a bai traha un kaminda sin mas, sin ku e ta gusta. P’esei el a skohe pa bai riba su mes. E tabata kana ku su idea i e sa ku tur hende tin idea pero ta e kurashi tin di tuma pa pone den práktika. El a siña ku si bo tin idea, skibié i ora skibié bo ta saka plan i asina e idea ta haña bida. I asina aki su pashon a lanta mas ainda i e miedu pa hasi algu nobo ta kita i e pashon ta dominá. “Nos mester tuma mas inisiativa, mas enkurashamentu pa hasi algu diferente. E kos ta difísil pero ta mihó pa e hasi ku despues e lamentá pa no a hasié”.

Pa esun ku ke kuminsá su negoshi tin instansianan pa yuda. Geric tabata sa di esakinan pero e no a bai niun ainda. E kier a kuminsá riba su mes sin fiansa pa e por lanta riba su pia promé.

Zut zür....

Popcultr tin diferente sabor i esun ku mas hende ta gusta aktualmente ta di kiwi strawberry. E ta visualmente bunita i e hende na Kòrsou ta gusta kos zut zür. E tin hende ta bai Punda Vibes djis pa kumpra e pálufriu. Tur siman Geric tei na Punda Vibes riba djaweps.

Pronto mas sabor....

Den futuro Geric ke introdusí mas sabor. Den futuro Geric lo bai usa frutanan lokal manera tamarein tambe pa traha pálufriu. Ainda e no a kaba di perfekshoná un smak pa e usa e tamarein. E ke bishitá mas evento tambe ku su produkto i e ke topa mas empresario hóben. Na momentu ku el a kuminsá ku e negoshi aki el a topa diferente di nan ku ta hasiendo un gran kontribushon na nos isla. I loke ta masha remarkabel ta ku e empresarionan hóben aki ta yuda otro pa nan negoshi bai mas dilanti.

Mas idea....

Geric tin mas idea inovativo pero e ke pa e pálufriunan aki subi merkado i stabilisá pa asina e por sigui pa e siguiente paso. Geric ta haña ku e kos di mas importante pa un empresario ta trese goso den hende su bida.