WILLEMSTAD.- Negoshinan a kuminsá konsientisá klientenan pa mantené nan mes na regla dje medidanan vigente pa ku COVID-19. Esaki por konstatá na momentu ku e Tim Multidisiplinario a realisá kontrol djárason na e establesimentunan aki.
Na un toko a pone mensahe bon kla pa e kliente por kumpra kos i bai kas. A ripití e asuntu di bai kas na dos okashon riba e papel. A indiká na e kliente ku e no por para dilanti dje establesimentunan.
Tambe na vários sitio, ku tin fasilidat pa sinta, e doñonan a pone sinta p’asina evitá ku hende ta keda para dilanti dje establesimentu i hinka e doño den problema. Pasobra e doño por haña but debí ku e ta permití hende para bebe dilanti su negoshi.
Por general di e 15 negoshinan kontrolá djárason for di den oranan di mainta te ku anochi lat, bastante ta kumpli ku reglanan.
Algun establesimentu a haña un aviso pa permití kliente para na lokalidat i konsumí alkohòl na e sitio. ta trata di establesimentu riba Winston Churchillweg, Snack na Gato, MiniMarket na Dusu, Mini Market na Pannekoek.
Un Mini Market na Jan Donker 45 a haña aviso pa aglomerashon. I un trùk di pan na Siberie a risibí un but pa orario di sera.