WILLEMSTAD.-Elekshon ta tras di lomba i tur atenshon ta bèk riba asuntunan ku tin e komunidat aki preokupá kualnan ta desaroyonan rondó di Covid-19 i tambe futuro di refineria. Nos ta yegando fin di mart loke impliká ku Refineria di Kòrsou (RdK) mester kumpli ku e trahadónan di CRU ku ta den su servisio. Sifranan ku RdK mes a publiká anteriormente ta mustra ku ta alrededor di 3 mion florin ta nesesario.

Informashon ku EXTRA ta dispone di dje ta indiká ku e negosiashonnan ta kanando bon. Tin hopi detaye ku mester atendé ku e delikadesa nesesario pero di tur banda a sigurá EXTRA ku e negosiashonnan ta kanando den bon direkshon.

Den un prinsipio a indiká ku pa febrüari òf mart e negosiashonnan lo ta kla, pero awor ta resultá ku no ta logra ainda. Esaki no ta nifiká ku tin niun problema, solamente ku e detayenan relashoná ku un refineria ta hopi i mester atendé esakinan. No ke duna un indikashon di tempu eksakto pero a splika EXTRA ku por dura mas ku un luna pa keda kla. E espektativanan den komunidat ta hopi grandi pa realisashon di e proyekto aki.