WILLEMSTAD.- Ayera outoridatnan di komishon di Karnaval mester a pidi asistensia di profeshonalnan pa por a atendé ku un nèshi grandi di abeha ku tabatin den palu den kurá di un kas riba Rooseveltweg. E habitantenan di e kas mes no a nota ku tabatin e kas di abeha aki, pero danki Dios a aktua na tempu.

Ta trata aki di un kas di abeha ku tin basta tempu. Un apelashon ta bai na tur hende ku por nota presensia di hopi abeha na kualke sitio, prinsipalmente riba ruta di karnaval pa informá Stanley Ignacio di esaki, pa evitá situashonnan kaminda abehanan ta ataká hende durante marcha di karnaval.

Esaki ta algu ku ta posibel ya ku vibrashon di músika i trafikashon di hopi hende den bisindario ta pone ku abehanan ta sali pa ataká.