WILLEMSTAD.- Ta algu inkreibel kuantu kurashi malechornan ta hañando dia pa dia. Ni na e sitio kaminda ta e.o atendé i huzga kasonan penal, bo vehíkulo no ta sigur.

Ayera mainta un abogado ku a yega Kas di Korte pa asina kumpli ku su labor a pèrdè su vehíkulo despues ku malechornan a kibra glas i bai ku esaki. Ta trata di un vehíkulo Hyundai Sonata koló pretu ku tabata stashoná riba un tereno di parker ku a wòrdu trahá spesial pa tur trahadó/bishitantenan di Kas di Korte.

E abogado a baha for di su vehíkulo, i na su regreso ku tabata alrededor di 9 or di mainta, esaki ya no tabata tei mas. Uniko testigu silensioso ku a keda atras ta e glasnan kibrá.

Awor e pregunta ta bini kon por ta posibel ku na kas di Korte no tin kámara òf personal di seguridat pa wak e vehíkulonan Meskos ku ta e kaso aki a tuma lugá, asina por tabata algu muchu mas grandi tambe. E abogado entre tantu ya a entregá keho ku e speransa ku e lo rekuperá su vehíkulo bèk.

Kualke persona ku tuma nota di e vehíkulo aki òf kualke moveshon sospechoso di malechornan, tuma kontakto ku polis na number di telefòn 911 òf 917.