WILLEMSTAD.- Minister-presidente Eugene Rhuggenaath djamars último a presentá adaptashon den benta i uso di vürwèrk. E aña aki ta permití benta i uso di vürwèrk pa uso personal. No ta posibel pa personanan individual pone show di vürwèrk ku ta okashoná aglomerashon den por ehèmpel bario òf riba kareteranan públiko. Ta bin ku reglanan spesífiko pa bendedónan di vürwèrk. Na tur momento nan mester sòru di mantené reglanan di higiena i sufisiente distansia sosial.
Benta di vürwèrk ta kuminsá riba 27 di desèmber. Riba 30 i 31 di desèmber despues di 4 or di atardi, solamente den forma di ‘take out’ i a base di pedido adelantá.
No ta permití uso di vürwèrk riba kareteranan públiko òf riba tereno propio den kuadro di seramentu di aña komo kompania i organisashon. Kompanianan komersial, lástimamente no por duna show di vürwèrk i pagara e aña aki, ya ku esaki ta trese hopi aglomerashon i mester evitá esaki.
Pa hotèl i lugánan di hospedahe, ta permití tiru di vürwèrk únikamente entre 31 di desèmber 2020, 12 or di anochi i 1e di yanüari 2021, 1 or di mardugá. Pues, e kompleho por kumpra vürwèrk únikamente pa uso durante kambio di aña. Uso di vürwèrk aki mester sosedé riba tereno privá di e lokalidat i solamente pa wéspetnan registrá. Uso partikular no ta posibel pa wéspetnan den e hotèl, pues hotèl i apartamentonan so por sende vürwèrk pa su wéspetnan.
Minister-presidente Eugene Rhuggenaath a splika ayera ku tin un tim ku ta formá di e Tim Stratégiko di gobièrnu segun algun tempu ta wak nos kustumbernan. ‘Nan ta wak tambe nos selebrashonnan na fin di aña i apertura di aña. Kiko por sigui bou di ki kondishon? Nos lo sigui duna komunikado riba esaki.’ E promé komunikado di e tim ta relashoná ku adaptashon den benta i uso di vürwèrk.