WILLEMSTAD.- Nilda Pinto SBO na Suffisant tin un direkshon di estudio nobo ku ta pelukero/Kaper. E ta pa hende muhé i hende hòmber. Direktor interno Melrose Cornelia i dosente di habilidat sosial i koordinadó di stazje Germain Rafael a duna un bista di e trayektonan na Nilda Pinto SBO i enpartikular esun di kaper.
Kuido ta esensial
Den e 2 añanan ku a pasa, Nilda Pinto SBO a krese. E skol ta ofresé trayekto inisial, nivel 1 I tambe nivel 2. E trayekto inisial ta un proyekto ku ta duna e studiante 6 luna di preparashon pa por drenta nivel 1 sin niun problema. Despues ku e studiante terminá e trayekto inisial, e ta kontinuá ku nivel 1, ku ta konsistí di asistènt di horeka I kuido. Na komienso di 2024, e skol kuminsá ofresé nivel 2, despues di terminashon di nivel 1, ku ta enfoká tambe riba pelukero/kaper. Segun yùfrou Melrose, kuido ta esensial na Nilda Pinto SBO Suffisant, komo esaki ta e último oportunidat pa e studiante risibí su diploma.
Prepará studiante pa sigui desaroyá
Nilda Pinto SBO Suffisant ta prepará e studiantenan pa sigui desaroyá su mes. Bo por ta un studiante di AGO, VSBO, òf otro nivel pero pa kualkier motibu no por a kaba bo estudio i risibí bo diploma. Pa esnan ku no a kaba niun tipo di skol nan ta brindá e trayekto inisial. Ta importante pa menshoná ku idioma no mester ta un barera komo e trayekto inisial ta na papiamentu. Bo por kuminsá e trayekto inisial na ougùstùs I bo ta gradua na desèmber òf bo por kuminsá yanüari i kaba yüli. Ora bo terminá ku e trayekto inisial bo no mester warda 6 luna pa kuminsá te ougùstùs atrobe. Pero e skol ta brindá e oportunidat ku manera bo kaba desèmber bo por kontinuá ku bo nivel 1 ku ta den horeka òf kuido. I Melrose a pone énfasis ku nan trayektonan ta na papiamentu esta idioma no mester ta e barera.
Pelukero pa muhé i hòmber
E interes pa pelukeria ta eksistí, pero no ta hopi haltu komo e skol no tabata tin e oportunidat pa promové manera deseá. Aktualmente, tin 10 studiante di kual dos ta mucha hòmber. Na promé instante, esaki tabata un sorpresa komo pelukero hopi bia ta keda mira komo algu pa mucha muhé, pero mucha hòmber tambe. Meskos ku awendia tin hopi trabou ku no sa mira hende muhé ta hasi normalmente, ku awor nan tambe ta hasi. Sinembargo, esaki ta mustra ku e mundu a kambia, i Nilda Pinto SBO Suffisant ta forma parti di e inovashon aki tambe. E nivel aki no solamente siña bo kon pa hasi kabei; despues di dos aña, bo ta bira un pelukero diplomá. Adishonalmente, e studiantenan ta risibí konseho riba kon pa hasi esaki un negoshi.
Habilidat sosial
Despues, Germain a splika su tarea komo dosente di habilidat sosial i koordinadó di stazje. Den e materia di habilidat sosial, e studiantenan ta siña konosé nan mes. Ta importante pa menshoná ku konosé bo mes ta mas ku solamente bo nòmber. Manera un artista famoso a kanta, “si bo no sa ken bo ta, otro lo bisa bo ken bo ta.” E materia ta guia e studiantenan pa konosé nan mes, kon pa rekonosé nan puntonan fuerte i esnan ménos fuerte, e bareranan ku nan ta topa, kon nan ambiente a forma e persona ku nan ta awe, nan normanan i balornan. Adishonalmente, e estudiantenan ta siña kon pa kibra e bareranan i kuminsá di nobo. Un otro punto fuerte pa konosé bo mes ta Integridat. E studiante ta siña kon pa para den nan sapatu, bisa NO firme, sali pa nan mes, analisá i antisipá kada eskoho su konsekuensia.
Prepará e aktitut laboral
Pa ku stazje, e trayekto ta prepará e aktitut laboral di e studiantenan pero tambe ta siña e kon pa interaktuá ku otro. Germain a indiká ku e reto ta relativo. Si e mentalidat ta basá riba krea un fundeshi di konfiansa, amor, i komprenshon, pues e parti di siña ta sigui naturalmente una bes e fundeshi ta kreá. Na e momento ei, trabou ta sinti manera un hòbi, i kada fruta di bo esfuerso ta trese kosnan grandi ku ta sigui motivá bo. Bo por duna ehèmpelnan na studiantenan pa nan haña e wesu di lomba ku nan no a haña na diferente parti di nan formashon.
240 studiante
Nilda Pinto SBOL Suffisant tin mas o ménos 240 studiante. E skol ta enfrentá retonan manera mantené e konsistensia di e studiante. Tin hóbennan di 16 I 17 aña, i bo mester mustra nan ku nan ta na un SBO kaminda nan aktitut mester kambia i bira mas profeshonal. E buki di Alice in the wonderland ta bisa ku e pushi ta puntra Alice “Unda bo ke bai?” Alice ta kontesta ku e no sa kua direkshon e ke bai. E pushi ta respondé “Si bo no ta sigur unda bo ke bai, unda ku bo bai lo ta ideal pa bo”. Ta sumamente importante pa ora bo kuminsá bo keda, i risibí bo diploma. Nos ta dediká pa traha huntu ku tur nos studiante pa logra esaki.
Les na papiamentu
Nilda Pinto SBO tei pa pa sera kualkier buraku ku ta stroba abo komo hóben studiante. No laga idioma ta un barera paso banda di bo materianan prinsipal bo por risibí lès adishonal di papiamentu, hulandes, ingles i asta matemátika. Si bo tin problema ku kos di kareda, Nilda Pinto SBO Suffisant ta ofresé un karchi di bus si pa un òf otro motibu bo por a bin skol pero no por bai kas.
Pa registrá bishitá e página di Facebook: Nilda Pinto SBO Suffisant. Lo bo topa un link ku ta guia bo na e e página di aplikashon. Tambe por tuma kontakto ku e skol via di telefòn na 868-5206 òf via di Whatsapp 661-5206. Tur hóben entre 16 i 24 aña ku no tin diploma ta invitá pa registrá na Nilda Pinto SBO Suffisant. Nan ta ofresé e studiante tur loke nan mester, miéntras nan tin e deseo.
