WILLEMSTAD.- Korte ayera a trata kaso di e famia di fam Reina, akusá pa un plantashon grandi di mariwana ku a keda deskubrí dia 10 di sèptèmber 2020 den área di Cabo Verde i Seru Fortunaweg.
Ta trata di un mama ku 5 yu hòmber i tambe un otro akusadó femenino nasé na Colombia ku ta pareha di un di e ko akusadonan.
Ministerio Públiko ta akusá J. Reina (34), G. Reina (29), U. Reina (32) e akusado femenino L. Grafito (29), e mama S. Ersilia.(51) i D. Reina di tabatin plantashon di mariwana, ku a pisa mas di 1699 gram, tambe algun gram di hash i un kantidat di 6857 gram di mariwana.
Segun e akusashon mas aleu, nan tabatin mas di 1800 mata di mariwana entre Cabo Verdeweg i Seru Fortunaweg.
U. Reina ta keda akusá di tabatin 2 arma di kandela ku ta Glock i Smith & Wesson i G. Reina ta keda akusá di tabatin un pistol di alarma.
Durante un kaso pro forma, ámbos akusado femenino a keda poné den libertat pendiente nan kaso keda tratá. Despues tantu J. i D. Reina tambe su detenshon a keda di skòrs.
Den e kurá, polis a deskubrí un “kit” ku nan a konsiderá komo un laboratorio, kaminda paketenan chikí di mariwana tabata wòrdu traha pa benta.
Den e kit polis a haña un maleta ku tabatin 25 mil florin kèsh i tambe un arma. Tur e akusado a ninga di tabata sa di e kit i òf e plaka.
Hues a splika ku tur kos a kuminsá ku un informashon ku a drenta 4 di ougùstùs 2020, ku den un área na Cabo Verdeweg tin un plantashon di mariwana. A saka potrèt for di den laira kaminda por a mira e plantashon enorme.
Tambe a drenta e informashon ku na e adrès en kuestion tabatin hòrtamentu di awa i koriente.
Aqualectra a bai na e sitio ku polis pa kontrolá i a mira un hende sali kore bai fo’i den e kurá.
Dia 10 di sèptèmber 2020 polis a tene un entrada hudisial na e adrès i a kanta Bingo. Hues a bisa ku tur hende ku ta biba den e kurá ei a tuma responsabilidat riba kada un su pida tereno.
Pero tin dos kos ku niun hende ta tuma responsabilidat pe, ku ta e arma ku a keda hañá den e kasita, e 25 mil florin kèsh i tambe kantidat di mariwana kla pa wòrdu prosesá den e semi laboratorio.
Den e bibienda di J. Reina i Grafito polis a haña un par di saku di mariwana ku a pisa 19 gram i un total di 14 gram di hash. J. Reina a bisa ku ta di dje pa su propio uso.
Den nan kurá tambe polis a haña 1220 mata di mariwana na tur.
J. Reina a splika ku e tabatin solamente 3 luna ku e plantashon. Segun e akusado, e ta huma hopi i ta gasta hopi sèn na mariwana, p’esei el a kuminsá planta. E tabata usa e blachinan tambe pa remedi.
El a bisa ku na momento ku el a kuminsá hasié, e no tabatin djòp mas. Segun e akusado dia ku nan a tira su “brother” e tambe a haña bala na tur dos rudia i no por a subi trapi bon mas na su trabou, pasó e tabatin hopi doló.
Esei a pone ku el a subi “YouTube” pa wak kon ta traha remedi di e blachinan pa e por aliviá su doló di rudianan. E no tabata sa ku por haña kastigu pa blachi di mariwana.
Grafito na su turno a splika ku e no tabata sa nada di e sakunan di mariwana i no a paga tinu ku tabatin plantashon. Polis a bisa ku e plantashon por tabata visibel i por mira e matanan for di un bentana patras di nan kas.
Un dama chines ku tabatin relashon amoroso ku U. Reina a deklará na polis ku tur hende tabata sa ku na Caboverdeweg ta bende mariwana.
Na e kas di G. Reina polis a haña sakunan di mariwana ku a pisa 1699 gram, 4 gram di hash i 353 mata di mariwana.
G. Reina a bisa ku e palunan tabata di dje, pero e sakunan di mariwana tabata di un Chamo ku tabata pega blòki pe.
E Chamo a warda e sakunan serka dje pe bai ku nan despues.
Hues a bisa ku na polis su mama a deklará ku el a mira G. Reina a kuminsá huma, pero despues a kuminsá bende. Pa loke ta trata e arma ku a haña den su kas, el a bisa ku e ta para responsabel pe. Ta trata di un alarma di pistol ku el a laga un mucha muhé bestèl pa e traha video clip.
E mama na su turno a splika ku e no sa nada di e droga. E tabata mira nan den kas si, pero no por bisa nada di nan. Di plantashon tampoko e tabata sa, pasó nan tabata tapá bou di palu i tambe palèt.
Na kas di U. Reina polis a haña 2 arma, kantidat di mariwana, 3 Toyota Corolla, 45 mil florin kèsh, quad i tambe un “mountain bike”. E akusado a splika ku e tabatin e armanan pa motibu ku un bia nan a tira atrako riba dje i el a keda ku miedu.
Segun e akusado e tin e armanan mas ku 5 aña i nunka a usa nan. Pa loke ta trata e 45 mil florin, el a splika ku e ta bende i kumpra outo. E ta traha duru i a spar hopi tempu.
Fiskal a bisa ku si niun hende tuma e laboratorio riba nan, e ta bai pone ku tur ta haña un pida pa para responsabel den su demanda.
Na final e kaso a keda posponé pa haña rapòrt di Reclassering di kada akusado, ku ta di sumo importansia ora hues ta bai tuma desishon. Abogado Snijders a pidi pa skòrs detenshon di G. Reina, pero hues a rechasá e petishon. E kaso lo kontinuá dia 22 di sèptèmber ku rekisitorio di fiskal, demanda i tambe defensa di e abogadonan.