WILLEMSTAD.- E problema di mas grandi ku Wardakosta a konfrontá tur aña tantu durante komo despues di selebrashon di Fuikdag ta hendenan seriamente bou di influensia di alkohòl. Wardakosta ta hasi su chekeonan, pero tòg ta hasi un apelashon riba e sentido di responsabilidat di kada ken, spesialmente di kapitannan di boto pa tene e bebementu di un forma moderá òf si ta posibel no bebe mes, ya ku te ta responsabel pa henter e tripulashon riba e boto. Tanten ku niun hende no ta responsabel pa selebrashon di Fuikdag, mester pone reglanan estrikto pa seguridat di esnan ku ta bai. Asina sr. Roderick Gouverneur, bosero di Wardakosta, a duna di konosé den un entrevista ku EXTRA ayera mainta.
T’asina ku e tradishonal Fuikdag e biaha aki lo ser selebrá dia 8 di yanüari 2017, i un biaha mas ta spera ku un kantidat di hende lo ta partísipe. Resientemente Ministerio Públiko huntu ku demas aktornan den e kadena hudisial a emití un komunikado den kual a bolbe duna un splikashon dje reglanan. Segun sr. Gouverneur, básikamente e reglanan a keda igual. Pero pa e próksimo Fuikdag a disidí di enforsá un regla en partikular.
A disidí ku pa 5’or di atardi ta para tur muzik i pa tur hende por kuminsá prepará pa nan regreso pa drenta bèk e bahia di Spaanse Water promé ku anochi sera. Eksperensia di último añanan ta mustra ku na momentu ku nochi sera kapitannan sa tin problema riba laman pa motibu di visibilidat (kombiná ku alkohòl), ku e konsekuensia ku nan boto ta pega etc., ku tur e konsekuensianan ku esei por tin pa e tripulashon.
Nos a puntra sr. Gouverneur kua ta e infrakshon di mas frekuente ku nan ta topa, i sin pensa muchu el a deklará ku esei ta di hendenan bou di influensia di alkohòl. Tin hende ta reklamá i bisa ku mester apliká e regla di supla blas, pero no ta algu ku ta posibel kaminda tin míles di hende huntu. Pero na un hende su komportashon por determiná ku e ta fuma. Nan mester komprondé ku Wardakosta ta hasi tur esaki pa seguridat en general, inklusive di nan mes. Ta kontrolá tambe si tin tur dokumento dje boto na òrdu.
Komo ku te awe no tin ningun hende òf organisashon ku ke para responsabel pa e aktividat aki, no por permití tampoko ku tin bendementu di kos ni ponementu di vlòt pa entretenimentu. Es mas, ta dependé dje boluntat di boluntarionan pa hasi limpiesa tantu riba tera komo den awa.