WILLEMSTAD.- Di fuentenan ofisial no a tende ku na Kòrsou lo a deskubrí un mutashon dje vírus di COVID i kual a keda denominá komo e variante di India. Asina dr. Izzy Gerstenbluth a laga komprondé bon kla ayera durante un enkuentro ku prensa. Segun e epidemiólogo e no a tende nada ofisial di niun hende, i si el a yega islanan di èks Antia, a lo ménos no ta na Kòrsou.

Ta bini aserka ku, no tin masha informashon al respekto pa bisa ku lo tin di preokupá kuné. Ta ser bisá ku e lo ta stimulá transmishonnan mas rápido, pero no ta konosí si esei lo ta pa motibu di sirkunstansianan na India unda tin hopi hende ta biba riba otro i ku ta hasi e posibilidat pa kontagio muchu mas grandi. Den hopi aria tin hopi hende pober ta biba, loke ta otro kondishon pa un vírus plama pasobra no ta tene masha kuenta ku higiena ni nada.

Pues no tin muchu informashon, i ademas for di e mundu sientífiko no ta bisa ku e mutashon aki ta un variante di preokupashon. No lubidá ku tin mas variante e.o. di Mexico, pero niun hende no ta papia di dje mes, i esei ta pa motibu ku e no ta un variante di preokupashon, pues di peliger.

Manera EXTRA a informá ayera den oranan di mainta, for di Ulanda a drenta informashon ku entretantu Karibe Ulandes tambe lo tin un otro variante di Corona vírus. Segun e instituto ulandes RIVM, Karibe Ulandes tin e variante Indio. RIVM a bisa ku nan a topa ku un (1) kaso di e variante di e vírus ku a muta. No a konosí riba kua di e islanan a topa ku a variante indio. NOS ta indiká ku na Ulanda ainda no a topa ku e variante Indio.

E variante aki lo ta pèrkurá pa oumentu drástiko di e kantidat di hendenan ku ta keda kontagiá na India. Esei ta motibu di hopi preokupashon serka sientífikonan. Tin informashon ku e bakunanan lo ta ménos efektivo kontra di e mutashon nobo aki.

E instituto ulandes a informá ku nan ta sigui e desaroyonan rondó di e plamamentu di vírus na India hopi djaserka, konsiderando ku na India alrededor di 200.000 hende ta keda kontagiá pa dia. Segun un bosero, no ta konosí si e variante indio lo ta mas kontagioso ku e mutashonnan anterior. Kisas ta e situashon na India ta kondusí na e mutashon aki.