4 hende detené pa eksploshon/kiebro ATM i e kasonan ta kontinuá

WILLEMSTAD.- Atrobe malechornan a eksplotá un ATM, e bia aki unu di Banco di Caribe na Tera Kòrá. Bosero polisial Imro Zwerwer a konfirmá pa EXTRA ku no a logra bai ku niun sèn for di e mashin di plaka, e destrukshon si ta inmenso. EXTRA a papia ku CEO di Banco di Caribe sr. Fons Simon kende a deklará ku bèrdat a kousa un daño enorme na e mashin i e edifisio, pero no a bai ku niun depchi. E bankero a duna di konosé ku for di e promé intento ku malechornan a hasi resientemente a pone ku Banco di Caribe a tuma medidanan sumamente drástiko. Lo sigui tambe tuma mas medida di seguridat, mas ainda ora tuma nota ku e malechornan no tin éksito na mashinnan di Banco di Caribe. A hasi detenshon relashoná ku kasonan anterior pero e kasonan ta sigui. Riba esaki e direktor a bisa ku nan no ta na altura kuantu grupo lo ta kometé e fechorianan aki, pero nan ta keda alerta pa loke ta trata protekshon di mashinnan i ta sigui duna servisio na nan klientenan.

Banco di Caribe ta tuma nota ku ta den oranan di anochi lat i mardugá e fechorianan ta tuma lugá i p’esei ta invitá nan klientenan pa hasi uso di mashinnan di plaka den dia i tene bon kuenta ku seguridat personal ora di bai lanta sèn. E ATM na Tera Kòrá no ta traha e dianan aki pero klientenan por hasi uso di esun na Sta.Maria òf tambe na Barber. Ta mas ku 30 ATM Banco di Caribe tin rònt Kòrsou pa sirbi pueblo di Kòrsou.

Update

Relashoná ku esaki EXTRA a puntra bosero polisial Imro Zwerwer si e personanan ku a keda detené despues di e kaso ku e mashin di plaka di Giro na Corrieweg, ta detené ainda. Sr. Zwerwer a duna di konosé ku e personanan ei ta detené ainda. Es mas awor aki tin 4 hende detené relashoná ku eksploshon di mashin di plaka (ATM). Mientrastantu un kaso nobo a sosodé den oranan di mardugá, loke ta un indikashon ku tin mas di e malechornan ku ta kometé e tipo di aktonan aki.