WILLEMSTAD.- E desbalansa di esun ku tin i esun ku no tin den enseñansa ta grandi. Esei pasobra si un kas no tin Internèt, e no tin kaminda pa e mucha por hasi lès trankil,  e mucha ei no ta logra. Rector Magnificus di University of Curaçao dr. Francis de Lanoy a bisa ku nos a supestimá e asuntu aki kompleto.

A supestimá e asuntu di ‘schoolopvang’ òf mucha ku ta kome na skol. Tur esei a kai afó. E mucha ku tabata haña guia serka su dosente despues di skol òf den bario òf un kaminda ku e por bai huntu pa hasi lès a kai afó. E esaki no pa enseñansa avansá i universitario pero pa esun primario.

“Ami no sa kon nos ta bai dil ku  e atraso ei, pero e ta algu global. Tin pais despues di e promé ola a reakshoná mas agresivo kon dil kuné. Nos manera na Kòrsou  no a  reakshoná riba dje, pa diferente motibu no tabata sufisiente agresivo, pa e diskrepansianan keda eliminá”, segun dr de Lanoy den deklarashon na EXTRA.

I e enseñansa primario ta e fundeshi di nos pais. E rèktòr a splika ku un mucha den grupo 1 i 2 ku tin di desaroyá su habilidat motóriko ta algu difísil pa sosodé ‘online’. E ta kuminsá ku rònchi grandi i mas mas chikí te ora e ta dominá e fasilidat a su pòls. Kon e mucha ei ta hasi e kos ei ‘online’ sin ku e tin algun mayor ku tin un tiki abilidat òf un tanchi/tio ku por trein e den wikènt. E pobersitu mucha, kiko ta pasa ku mama ta traha, tata ta wak kon ta lora, e mucha ei so ta na kas. Kiko ta pasa ku e mucha ei. E mucha ku tin di start ku e parti motóriko ta desaroyá pero e no ta desaroyá.

Meskos enseñansa avansá kaminda e hóben tin di hasi su práktika di kímika, práktika di físika, kon ta hasi ku eseinan. Esun ku tin por bai serka un konosí òf amigu ku ta hasié, pero esun ku no tin kiko lo pasa kuné.

Rector a bisa ku ta un situashon difísil i komo pais bo tin di prepará bo mes kon ta dil ku e kos ei den futuro. Ta un reto i ta un preokupashon den Karibe. Pero den Karibe ta informá i kompartí eksperensia ku otro kon pa dil ku e tipo di kosnan ei. E transferensia di e konosementu ku bo haña dor di e interakshonnan ei den akshon, serka nan di den Karibe ta mas agresivo ku nos.