WILLEMSTAD.- E situashon den Kaya Kazerne bai na Rio Canarioweg ku ta konektá na Punta Cardonweg ta realmente tristu.

Ya pa algun tempu kaba burakunan a kuminsá surgi den e kaminda pero ku segun tempu esakinan a kuminsá bira muchu mas. Awor a yega un punto ku no tin ni kaminda mas, ta buraku so tin. Un kaminda kual dos vehíkulo por kore banda di otro a para bira 1 kaminda debí ku outomobilistanan mester wak vehíkulo ku ta purba kita pa buraku riba kontra man. Ta purba kita pa buraku pero no por evitá ku tòg vehíkulonan ta kai den buraku debí na e tantísimo burakunan ku tin.

Abitantenan a indiká na EXTRA ku ora áwaseru kai ta pió pasó bo no ta mira e burakunan mes mas pues ta kai vehíkulonan ta kai den buraku. Outomobilistanan mester hala te riba alsera pa skapa poko buraku lubidando ku tin peaton ta kana kantu. Konstantemente outomobilistanan ku ta frekuentá e kaminda aki ta haña nan den gastu inesperá despues di a e.o kibra tayer. E kos di mas tristu ta ku riba e kaminda aki tin asta un hospital di duna lus.

Abitantenan ta kansa i man na kabes rogando pa e instansianan konserní duna atenshon na e situashon aki.