WILLEMSTAD.- ‘Dos di tres pashènt ku ta bin Departamento di Emergensia na Curaçao Medical Center (CMC) ta bin riba nan mes, ku ta nifiká ku nan no ta mandá dor di dòkter di kas. Di tur e hendenan ku ta bai departamento di emergensia di CMC 96% a wòrdu manda kas, pa motibu ku dòkter di kas por trata e kasonan.’ Asina dr. Ingemar Merkies, Direktor Médiko di CMC a bisa djadumingu último. Curaçao Medical Center (CMC) djadumingu último tabatin un sekshon informativo virtual di CMC, CHV i Inspektor di Salubridat.
Den e konferensia di prensa virtual Merkies a papia entre otro tokante ‘Prosedimentu di departamento di Emergensia i protokòl di dòkter di kas’.
Merkies a splika ku CMC tambe tin reto di COVID-19. ‘Den e 66 porshento di pashèntnan tin hopi hende ku ta bin ku kehonan ku por sierto ta den direkshon di COVID-19.’
Merkies a splika ku mas o ménos 6 porshento di e empleadonan di CMC a wòrdu infektá ku COVID-19. ‘Un di e departamentonan ku ta dil tur dia ku retonan di COVID-19 ta departamento ku Emergensia. Un parti grandi di hendenan ku ta wòrdu infektá ta na Emergensia. Komo konsekuensia CMC tin ménos hende trahando na Emergensia’, Merkies a splika.
Merkies a bisa ku for di luna di Mart Curaçaose Huisartsenvereniging CHV ta trahando riba reglanan i kiko ta e prosedernan ku dòkternan di kas ta bai hasi relashoná ku COVID-19. Segun Merkies spesífikamente tin atenshon den e protokòl tokante kehonan ku por mustra di direkshon di COVID-19.
Mas aleu Merkies a splika ku den un periodo den dos luna Departamento di Emergensia ta wak mas ku 3500 hende. Di tur e hendenan dos tersera parti ta hendenan ku ta ‘zelfverwijzend’, ku ta nifiká ku nan ta bin riba nan mes. ‘Si bo wak e grupo spesífikamente, hopi di nan no mester bai emergensia. Nan ta wòrdu mandá bèk na dòkter di kas. Pero nan ta kousa un ‘bottleneck’ den departamento di emergensia. I pa e motibu ei nos ta pidi hendenan ku promé ku nan bai Departamento di Emergensia pa tuma kontakto ku nan dòkter di kas.’