No dal mucha na kabes; e por kousa problema ku oido

Yvonne Pique

Presidente Quota Club Kòrsou

Rainelda Hellement

Miembro

 

…Bragadam bum bum, budum bam bam…..Ta zonidonan ku lo rementá den fin di aña. I p’esei ora e zonidonan ei ta rementando, laga nos kuido nos oido. Quota Club Kòrsou tur aña tin akshonnan intensivo pa konsientisá nos komunidat pa kuida nan oido. I e aña aki lo no ta nada diferente. Ban Kuida nos oido!

 

Presidente di Quota Sra. Yvonne Pique i Rainelda Hellement miembro a duna djasabra un splikashon di nan trabounan komo boluntario na Kòrsou. Quota Club ta un service club i ta trahando ku komunidat den kuadro di ‘Hearing & Speech project’ i tambe otro proyekto ‘disadvantage woman and children’ ku ta pa hende grandi i mucha ménos privilegiá. I tambe tin rekoudashonnan di fondo pa haña sèn. Quota ke hasi komunidat konsiente di kosnan ku ta sosodé den komunidat. Hopi hende no ta konsiente ku si algu pasa bo ora e no ta haña un di dos. Aki na Kòrsou e muzik mester ta duru pa bo gosa. Tambe hopi hende no ta konsiente ku tin hende den komunidat ku no tin e asina bon i p’esei ta konsentrá riba muchanan.

 

Inyektá kontra Rode Hond…

 

Ántes tabatin hopi mucha ku problema di oido na Kòrsou. Tin un skol spesial pa mucha ku problema di oido na Kòrsou. Muchanan di klas 4 òf 5 ta haña un inyekshon kontra di Rode hond i si hañ’é e por duna e beibi den barika di e mama problema ku oido i dor di e inyekshon ta evitá esei i p’esei e problema ku oido a bira ménos. Serka hende grandi ta otro; tur ta kuminsá hañ’é dor di muzik duru.

 

E problema di oido ta bin despues….

 

Rainalda a splika ku ántes tabata pensa ku hende grandi i edat avansá so tin problema ku oido. Pero awendia hopi mucha yòn tin problema ku oido. Tin músikonan por ehèmpel ku ta toka i no protehá nan oido. Tin e hóbennan ku ta kore den outo ku muzik duru. Kisas no ta sintié mesora pero despues di aña ta ripará ku e oido a bai atras. Tambe tin e hóbennan ku ta skucha nan telefòn òf nan weganan di kòmpiuter ku headphone. No tur ora zonido duru ta malu, segun Rainelda. Ta dependé di kuantu tempu bo keda mará na e zonido. Por ehèmpel si tin un muzik duru ta toka i a keda 20 minüt no ta asina tantu malu pero si keda un ora i un ora i mei i tur dia di dia i e ora ei si. Por ehèmpel ora bai un fiesta i yega kas i orea ta flùit tin hende ta bisa ku ta hende ta papia riba mi, pero segun Rainelda esaki ta señal ku bo a hasi daño na bo orea i p’esei ta sinti e flùitmentu ei. P’esei e hóbennan ku ta usa headphone mester límite i no tur ora. Na 2012 Quota a hasi un proyekto kaminda a tèst mas di 20 tokadó di brasbènt i a bin resultá ku ta 4 so su orea tabata sano. Hopi biaha e hóbennan aki ta bisa ku si nan bisti e dòpi di orea nan no por tende e zonido bon, pero esaki no ta bèrdat. Aki ta kuestion di kustumbrá.

 

Konsientisá….

 

Quota Club ta sòru pa diferente charla pa konsientisá hende pa kuida nan oido. Segun Yvonne, den e temporada manera esaki nan tin diferente programa i propaganda den medionan i ta bai skol tambe pa splika hóbennan. E kampaña ta prinsipalmente den temporada di karnaval. Den e temporada aki nan ta propagá e uso di dòpi di orea. Ta bai for di gobièrnu te abou. Si wak e kantidat di hende ku oido Sra. Yvonne a bisa ku e akshonnan di konsientisashon ta yuda tin biaha. Por mira mas i mas ku e muchanan den karnaval tin nan dòpi di orea. Pero tambe Quota ta duna tur mucha den karnaval di mucha i tiner dòpi di orea grátis, polis ta haña, Rode Kruis ta haña. I ora nan ta para na kantu nan ta wak si realmente e dòpinan ta keda usá. Tambe ta duna e beibinan kant’i kaminda grátis. Mas aleu tin steker i poster ku ta pega aki i aya.

Quota Club ta un klup di servisio ku miembronan boluntario. Nan ta yega na sèn dor di organisá rekoudashonnan di fondo i komunidat tambe ta yuda. Tin diferente empresa ta yuda. Por ehèmpel 13 yanüari tin e Wine & Tasting pa rekoudá fondo, Lo por purba diferente biña i kumindanan ku ta pas ku e biña konserní. I e aktividat aki su toke karnavalesko ta ku tur hende ku bin por bin ku nan maskarada.

 

Mas “Gebaren taal”…

 

E presidente di Quota ta kere ku aki na Kòrsou ora di dunamentu di notisia na televishon mester kuminsá hasi manera otro paisnan ku den hopi okashon ta pone un hende, den e huki abou ku ta usa e señalnan di man pa e hende surdu tambe por komprondé ta kiko ta pasando. I e hendenan ku ta usa e aparato di orea tambe tin problema ku e televishon ei. E keho ta ku na kada kanal e hendenan ta artikulá diferente i nan no por ‘volg’ esei. Pa esun ku problema di oido bo no por papia lihé pero mester papia ‘rustig’. Si por haña e ‘gebaren taal’ na televishon lo ta bon. Tin ku e aparato di orea ta yuda poko. Quota ta sostené tambe e fundashon Hag (Hulp aan auditief gehandicapten). Ta un grupo pa hende grandi i hóben ku ta bin huntu, nan ta sosialisá buska trabou i tur aña Quota ta organisá algu pa nan. E aña aki ta bai kore keiru ku nan pa konosé Banda Bou. Tin hopi lugá na Kòrsou ku nan no konosí ora nan ta huntu nan ta pasa masha dushi mes.

 

Rainelda a bisa ku tin trabou pa hende ku problema di oido pero mester di mas. Tin hende no ta konsiente di e situashon. Hopi ta muchanan sabí pero solamente tin problema ku oido. Lo ta bon si por bin mas posibilidat pa nan haña trabou i bin mas informashon pa hende sa ku nan por traha.

 

Dal na kabes….

 

Den temporada di karnaval no bai para den e spiker. Pa mayornan tempu di vürwèrk no laga e mucha para serka e dònderbosnan ku ta asina duru. Banda ku e ta peligroso e no ta bon pa oido. Un kos masha importante ta no dal mucha wanta na kabes pasobra e por afektá su orea. Antes tabata gusta ranka e mucha na su orea i esei tampoko no ta bon. No sinta ku mucha riba skochi den outo pasobra si e outo brek e mucha ta dal su kabes i esei ta malu pa su oido tambe.

SHARE

LEAVE A REPLY