WILLEMSTAD.- Ayera tabata otro dia ku e tim multidisiplinario formá pa MEO i polis a sali kaya pa asina kontrolá establesimentunan relashoná ku e medidanan di COVID-19.

Mester bisa ku komparando e último dianan, ayera tabata relativamente trankil. Na mayoria sitio no tabatin hende mes òf e establesimentu a sera kaba.

Ounke ku tòg aki aya tabatin algun punto di atenshon. Na un restorant “fast food” situá riba Dr. Maalweg e funshonarionan a yega i haña klientenan kumprando kos paden. E funshonarionan a indiká na e supervisor klaramente ku no por atendé ningun kliente paden. Uniko servisio ku por ofresé ta “Delivery” of “Take out” na bentana.

Na un restorant na Maripampun e funshonarionan a yega i konstatá ku tabata bende alkohòl na klientenan siendo ku esaki no ta permití. A hala atenshon di e propietario i kumpliendo ku e dekreto, a sera e establesimentu pa dos dia.

Kontinuando ku e kontròl e funshonarionan a pasa den área di Palu Blanku i a nota moveshon poko straño na altura di un minimarket. Ora a bai wak parti patras a gara e doño bendiendo produkto estilo”drive true”. Esaki tabata algu promé ku 9 or di anochi siendo ku for di 8 or e establesimentu mester ta kompletamente sera. E minimarket aki tambe a keda sera te ku próksimo aviso.