WILLEMSTAD.- Obispado di Willemstad huntu ku gobièrnu di Kòrsou a kontinuá ku e bon diálogo relashoná ku e situashon di pandemia i e medidanan ku tantu Gobièrnu i Obispado mester a tuma. Despues di evaluashon kontinuo di e situashon i den mutuo kolaborashon ku gobièrnu, nos ta informá komunidat ku Iglesia Katóliko ta bai kontinuá ku su selebrashonnan litúrgiko for di awe 4 di mei 2021. Tur esakinan teniendo na kuenta ku e medidanan estrikto ku Obispu a emití den su dekreto djaluna  3 di mei 2021.

Durante di siman i riba djasabra tur selebrashon ta sigui na e orario kustumbrá.

Djadumingu lo tin solamente un selebrashon 9 or di mainta den tur parokia. Tambe tur persona mester registrá di antemano pa asistí na misa, i e kantidat ta dependé di e espasio den misa sin surpasá e máksimo di 100 persona. Pa loke ta trata e orario di djabièrnè 12 or pa 3 or di mèrdia i djasabra mainta 8 or pa 11 or ta konta pa komunidatnan di otro religion di akuerdo ku nan norma i kustumbernan.

Laga nos tur mantené e medidanan di Gobièrnu ku a keda vigente.

Obispado ta pidi fielnan, pa sigui mantené e parti di registrashon via di e link ofishal ku ta: http://diocesewillemstad.com/registra/

Laga nos unu sigui kuida otro.