WILLEMSTAD.-  Ayera un biaha mas outoridatnan a keda dirigí pa e Kurá di polis kaminda ta warda vehíkulonan konfiská mihó konosí komo Kurá di Raspa. Esaki despues ku personanan den e área a tuma nota di algun moveshon straño riba e tereno banda di e outonan.

Na momentu ku e promé patruya a presentá na e sitio, por a tuma nota ku kandal na e kurá di e entrada prinsipal a keda kibrá. Mesora a kuminsá ku un investigashon preliminar pa asina wak si ta piesa a bolbe kita òf ta algu otro.

Mesora a konstatá ku falta vehíkulonan riba e tereno. A sali na kla despues ku falta dos vehíkulo Hyundai I-10 ku a disparsé for di riba e tereno.

Awor investigashon lo mester bai determiná ken mas ta sigui purba despues ku ya kaba algun dia atras outoridatnan a realisá tres detenshon relashoná ku robo riba e tereno miéntras ku ketu bai no tin un desishon definitivo pa ku seguridat riba e tereno.