WILLEMSTAD.- Un dje rekomendashonnan ku Kontrolaria General di Kòrsou (ARC) a duna na Parlamento di Kòrsou ta pa no laga e investigashonnan den kuadro di benta di edifisionan di Kas di Kòrsou keda te einan, pues pa no laga e kaso aki bai “doofpot”. Esei ta loke EXTRA por a konkluí for di kontestanan ku e direktor di Kontrolaria General, sra. Janella Cathalina, a duna ayera mainta den Staten riba e tópiko aki. Manera ta konosí, den e kaso aki Ministerio Plenipotensiario dje tempu ei sra. Marvelyne Wiels a outorisá òf tabata envolví den (intento di) benta di tres edifisio di Kas di Kòrsou, kual a perhudiká estado pa por lo ménos 3.6 mion florin.

Den su kontestanan sra. Cathalina a bisa ku den e asuntu aki tabatin envolvimentu te na sierto grado di e Ministerio di Asuntunan General, tambe e ministerionan di Finansa i Tráfiko, Transporte i esun di Planifikashon Urbano (VVRP). Tabatin un envolvimentu mínimo di e Ministerio di Asuntunan General, i na ki momentu e Ministerio di Finansa a duna su konseho. E ròl dje ministerio di VVRP tabata mas bien den e parti final di benta dje edifisionan. Esaki a enserá un interkambio entre e ministerio i Kas di Kòrsou pa e ministerio en kuestion por a traha riba un dokumento den konsepto pa e benta tuma lugá. Promé ku esei VVRP no tabata direktamente envolví.

Pa loke ta hür dje edifisio aki segun sra. Cathalina, ARC a bin topa ku un dokumento riba hür dje edifisio pero no por a haña nada na informashon pa sa ken a aprobá e hür aki. No por a topa ku ningun kontrakt firmá ku asina por afirmá ku formalmente a paga hür i dor di ken esaki a sosodé. Pero for di atministrashon di Kas di Kòrsou e montante ta aparesé si komo risibí, pues kosnan tabata poko konfuso.

Durante e reunion aki tin parlamentarionan ku a puntra si mester hasi investigashon mas aleu, i sra. Cathalina a duna komo kontesta ku un dje rekomendashonnan prinsipal di ARC ta pa hasi investigashon mas aleu, i ta bon pa Parlamento buska konseho hurídiko pa wak si por pone e aktornan responsabel pa e debakel aki.

Mas aleu e direktora a bisa ku e diferente rapòrtnan ku ARC ta traha ta mustra riba inkumplimentu ku lei. I kada un investigashon di ARC ku ta mustra riba inkumplimentu ku lei ta algu preokupante. ARC simplemente ta hasi su trabou komo kontroladó.

Den e notorio kaso aki di benta di edifisionan di Kas di Kòrsou, e Ministerio Plenipotensiario lo mester a risibí instrukshon di e Minister di Asuntunan General (Minister Presidente). For di dokumentonan e Premier dje tempu ei a mustra su kolega na Den Haag na vários okashon ta kon tin di kana e proseso pa haña aprobashon di gobièrnu.

Pero dor ku hopi biaha komunikashonnan ta bai via di mailnan privá ARC no por a haña un bista kompleto di tur komunikashon. Pero e Promé Minister a sòru pa desishon tuma lugá den Konseho di Minister.