WILLEMSTAD.- E manera kon ta trata dosentenan di skol, ta mas ku klaro ku niun hóben ta interesá ni inkliná na sigui estudio pa bira maestro di skol. Es mas, ta mas ku klaro ku na momentu ku a krea e posibilidat pa maestronan di skol por a baha ku penshun mas tempran (VVU), ku hopi ta hasi uso dje derechi ei pa nan bai pa kaba. Esei di akuerdo ku e presidente di SITEK, sr. Darius “Lio” Plantijn, den deklarashon pa EXTRA ayera nochi.

T’asina ku dia ku a lansa e idea pa empleadonan di gobièrnu bai ku VVU, maestronan di skol no tabata aden. Pero pa evitá desigualdat a inkluí nan. Na momentu ku a habri e posibilidat aki, ta lógiko ku hopi ta hasi uso di dje. Segun sr. Plantijn, masha tempu no tin rèspèt pa enseñansa, no por papia di balorashon, ni rekonosementu, ni insentivo pa trahadónan. Ta un lástima pasobra e lo por bira un sektor pa promové e profeshon bou di hóbennan pa drenta e mundu di enseñansa. Manera kos ta aktualmente, hóbennan lo bai skohe kualke otro profeshon unda nan ta traha di 8or pa 5or sin problema grandi. Un maestro di skol si tin di keda pensa henter dia.

Pero direktiva di SITEK ta duna palabra di elogio na trahadónan den enseñansa ku fo’i 2 di ougùstùs a sali for di nan fakansi i dediká nan tempu na hasi lokalnan atraktivo pa nos muchanan i pa nan mes. Nan a fèrf, drecha plafòn, laba bentana, limpia i drecha bankinan, kual defakto ta un tarea di gobièrnu. Pero ku esaki por mira e pashon ku trahadónan den enseñansa tin pa nan trabou i e amor pa muchanan apesar ku nan no a haña plaka di fakansi. Nan a bolbe hasi skol atraktivo pa nan i nan muchanan.

Tim estilo MEO:

Pa loke ta trata e protokòl mes ku Minister di Enseñansa a presentá e siman aki, SITEK a kuminsá pasa den dje, pero ta sinti falta di garantia di produktonan di higiena i di limpiesa pa henter aña eskolar, i tambe e servisio di limpiesa.

Segun sr. Plantijn, SITEK  tin e proposishon pa lanta un komishon estilo tim di MEO pa henter aña eskolar nan bishitá skolnan pa wak si esakinan ta kumpli ku e protokòl di limpiesa i higiena den skolnan. Un otro sugerensia ta pa garantisá kapasidat haltu di internèt, di manera ku ora lèsnan ta tuma lugá i studiantenan ta na kas, ku esaki no ta kai afó i asina perhudiká e muchanan.

BON DESEO;

Finalmente e presidente a ekspresá palabranan di bon deseo na tur esnan ku di un òf otro forma ta envolví den enseñansa. For di Minister di Enseñansa, esnan den e diferente direktivanan di skol, dosentenan, studiantenan i tur entidat di sosten manera FMS, SSC  i shofùrnan den transporte.