Di akuerdo ku Human Rights Defense Curaçao

WILLEMSTAD. - Di akuerdo ku un komunikado di Human Rights Defense Curaçao (HRDC), nan ta referí riba un veredikto di Korte ku ta hasi menshon ku por lo pronto no por deportá e señora venezolano E.C.B.P. pa Venezuela. E señora aki a hasi apelashon riba artíkulo 3 di Tratado Europeo pa
Derecho Humano, pa primeramente no keda deportá pa Venezuela.

Konforme artíkulo menshoná ta indiká ku no por deportá un hende miéntras ku tin e chèns real ku na su pais e lo por keda torturá òf tratá den un forma inhumano i denigrante.

E veredikto ta hasi menshon tambe ku si un hende ta permanesé den un pais ilegalmente i si e hende en kuestion no hasi nada o sea niun intento pa por optené un status legal, ta na su mes falta si e keda gará i deportá.

Pero di otro banda HRDC ta di opinion ku e artíkulo di Tratado Europeo pa Derechonan  Humano ta enfatisá ku no ta importá e komportashon di un refugiado.

Segun HRDC, e veredikto ta obligá outoridatnan di Kòrsou pa investigá si deportá e persona, ku su bida lo ta na peliger. E echo ku e ta ilegal no ta un punto, segun HRDC, simplemente no por deportá e persona.

E persona en kuestion tabata traha na Korte di Falcón komo un asistente den proseso penal. E tabata hopi okupá ku kasonan di korupshon na Venezuela i na vários okashon el a keda menasá ku morto.

Na aña 2016 el a logra sali for di Venezuela pa Kòrsou ku un visa di turista, loke ku nunka mas el a prolongá.

Na opinion di su abogado van Arkel, t’asina ku Kòrsou a introdusí un prosedura pero ku no a inkluí alohamentu ni tampoko título di estadia o seguridat sosial. Na opinion di van Arkel e aspektonan aki ta kontra di e espíritu di artíkulo 3 di Tratado Europeo pa
Derechonan Humano. Esaki ta pone ku na hopi okashon e resultado di e kasonan aki ta resultá negativo. Esaki ta pone ku masha tiki venezolano lo hasi uso di e prosedura menshoná.

Segun e komunikado t’asina ku tin mas kos relashoná ku e kaso di e señora aki, esta ku polis no a traha un prosèsverbal relashoná ku su aresto i esaki ta pone ku e historia tokante huida Korte no a pone atenshon riba esaki.

Pero e desishon di Minister pa deportashon ta enpugna ku e prinsipionan di motivashon.

E veredikto ta duna Gobièrnu di Kòrsou dos siman pa yega na un desishon nobo , teniendo debido kuenta ku e aspektonan ku e veredikto aki ta stipulá. Un di nan ta na opinion di HRDC, ku mester investigá si deportá e señora ku su bida ta den peliger.