...Segun Hunta di Konseho...

WILLEMSTAD.- Banko Sentral di Kòrsou i St. Maarten tambe mester forma parti di e lei ku pa kòrta den kondishonnan laboral di personal i direktornan di entidatnan semi gubernamental manera kompanianan  di gobièrnu i fundashonnan supsidiá pa gobièrnu. Asina Hunta di Konseho ta bisa den un konseho resien. Ta trata di un asina yamá “ongevraagd advies”, pues ku un konseho ku e hunta a duna riba inisiativa propio.

Segun Hunta di Konseho no tin motibunan bálido pa eksonerá Hunta di Komisario, gerensia i trahadónan di Banko Sentral for di e proseso di optimalisá tur entidat ligá ku gobièrnu manera palabrá ku Hulanda komo kondishon pa a risibí sosten finansiero. Krea un diferensia entre Banko Sentral i otro entidatnan gubernamental ta kontra di e prinsipio di igualdat, “gelijkheidsbeginsel” manera stipulá den areglo di estado di Kòrsou, den tratado oropeo pa derechonan humano i den e tratado di BUPO.

Alabes Hunta di Konseho ta bisa ku Konseho Sosial Ekonómiko (SER) tambe ta yega na e konklushon ku no ta konsehabel pa yega na un sistema ku tin diferensia den trato entre entidatnan ligá ku gobièrnu. Gobièrnu di su parti ta argumentá sinembargo ku no por trese adaptashon den e kondishonnan laboral di Banko Sentral sin hiba deliberashon ku St. Maarten promé.

Segun Hunta di Konseho esaki no ta un motibu ophetivo pa hasi un diferensia entre Banko Sentral i otro entidatnan gubernamental. Den e memoria di kontesta riba e proposishon di lei pa kòrta den kondishonnan laboral di sektor semi gubernamental no por konkluí tampoko ku gobièrnu di Kòrsou a hasi un esfuerso pa hiba deliberashon ku St. Maarten riba redukshon di e kondishonnan laboral.

Mas aleu Hunta di Konseho ta bisa ku gobièrnu no a hasi un análisis di kiko e riesgo finansiero pe presupuesto di pais lo ta den kaso ku no kòrta den e kondishonnan laboral di Banko Sentral. Konsekuentemente e pregunta ta lanta si esaki no por ta motibu pa Hulanda nenga mas fiansa di sosten den futuro.