Richard Gibson:

W’STAD/PHILIPSBURG.- St. Maarten mester tin e promé derecho pa disidí kiko ta pasa den futuro ku e propiedat di Mullet Bay. Asina kandidato riba lista di United People’s party (UP), eks minister i man drechi di Hushang Ansary, Richard Gibson ta opiná.

Gibson ta sigui pone atenshon den su kampaña pa elekshon di 19 ougùstùs awor riba e dil entre gobièrnunan di Kòrsou i St. Maarten huntu ku Banko Sentral di Kòrsou i St. Maarten (CBCS) pa garantisá pago di pólisanan di seguro (penshun) di 30 mil asegurado di ENNIA.

Gibson ta bisa ku CBCS tin kontròl riba e propiedat di Mullet Bay pasobra ta ENNIA ta doño di e propiedat. “Si ke bende Mullet Bay, St. Maarten mester tin e derecho pa skohe òf disidí promé”, Gibson ta indiká.

E propiedat ta parti di batayanan legal pa dos dékada kaba entre Ansary i CBCS, pero Gibson ta insistí ku kualke desishon pa bende e propiedat mester di aprobashon promé di gobièrnu di St. Maarten ku mester tin tambe kontròl riba desaroyo di e propiedat pasobra e ta di vital importansia pa ekonomia di e isla.

"No por permití ku ta  ENNIA ta disidí riba benta di Mullet Bay. E propiedat ta keda na St. Maarten i si ke bend’é St. Maarten mester tin di bisa den esaki.”

Gibson no ta kere den ekspropiá Mullet Bay pasobra esaki ta enserá ku gobièrnu di St. Maarten mester paga e doño konforme balor di e propiedat riba merkado. E ta proponé pa probechá di e posishon di St. Maarten pa sigurá ku ta tene kontròl riba poseshon di e propiedat i su desaroyo.

Segun Gibson CBCS, ku tin kontròl riba ENNIA, tin idea pa bende Mullet Bay a base di un taksashon ku a laga hasi di e propiedat. Na su opinion St. Maarten mester negoshá pa mantené kontròl riba desaroyo di Mullet Bay tantu pa turismo komo pa otro motibunan.

“St. Maarten mester tin e poder di di toma di desishon. Mester buska manera pa St. Maarten bira doño di Mullet Bay.” E ta kere ku e interes di St. Maarten por influensiá Kòrsou, mirando e riesgo ku 27 mil asegurado di ENNIA ku ta biba na Kòrsou ta kore.”

Gibson den algun publikashon previo a krítika e akuerdo ku a yega na dje pa skapa ENNIA loke na su opinion ta obligá St. Maarten vários mion florin pa Kòrsou den próksimo 50 aña. E ta mustra ku e intenshon pa St. Maarten a sali for di e konstelashon di Antianan Hulandes tabata pa e isla mantené i invertí su rekursonan lokalmente.

E ta kuestioná ku na promé instante Kolegio Supervishon Finansiero (Cft) a rechasá e promé akuerdo proponé pa despues a aprobá praktikamente e mesun akuerdo pero for di un diferente aserkamentu.