WILLEMSTAD.- Djaluna último mas ku 50 persona a akudí na sede di partido Nashonal riba Winston Churchillweg pa risibí yudansa pa nan problemanan ku debe di awa i koriente. Miembro di parlamento ku a start ku e inisiativa aki, Elvin Gerard ta bisa ku sintá na sede e mes a solushoná sigur 4 kaso pa asina por a habri konekshon di awa i koriente mesora.

Segun Gerard ta splika ta trata di kasonan kaminda èks hürdónan di e apartamentonan a laga un debe atras. Segun e parlamentario inkorektamente kompania di awa i elektrisidat, Aqualectra ta pone e debe di un eks hürdó riba lomba di hürdónan nobo i ta nenga di habri konekshon di awa i koriente pa nan miéntras ku nan no paga e debe bieu.

“Mester informá e trahadónan di Aqualectra ku ta traha ku kliente mas mihó. E kos aki no por. Doñonan di apartamento tambe mester ta alertá pa pone konekshon di awa i koriente riba nòmber di esun ku ta hür na e momentonan aki”, Gerard ta deklará.

E parlamentario ta rekordá tur hende ku nan por pasa te djabièrnè entre 9’or di mainta pa 5’or di atardi na sede di partido Nashonal pa risibí ayudo. “Despues di djabièrnè no por akudí mas pa ayudo. Hendenan a kuminsá mèldu na sede for di siman pasá djaweps despues ku a sali publiká ku e siman aki por akudí na sede.”

Esaki pa Gerard ta muestra di kon agudo e situashon ta pa hopi hende den komunidat i di un banda e ta satisfecho ku nan ta buska ayudo pa nan problemanan. Motibu pa e parlamentario a kuminsá ku e inisiativa aki ta e butnan ku Aqualectra ta imponé ora konstatá kasonan di hòrtamentu di awa i koriente.

Ta imponé un but di 5.200 florin ku segun Gerard ta hinka e klientenan den problema mas grandi. E ta rekonosé ku hòrtamentu den niun forma ta bon i ku tur hende ku faya tin ku sufri e konsekuensianan, pero e forma kon Aqualectra ta trata tur kaso igual pa e parlamentario pa Partido Nashonal tampoko ta korekto.

“Asta ora un hende kometé un krímen korte ta apliká diferente kastigu dependé gravedat di e akto kometé i bou di kua sirkunstansia esaki tuma lugá”, Gerard ta bisa. E ta boga pa kambia e sistema di but den unu kaminda ta dependé di e gravedat di e kaso kon haltu e but ta bira.

Ta bin aserka, segun Gerard ta sigui bisa, ku Aqualectra ta eksigí ku ta paga e but aki den un tiru. “No ta sera areglo di pago i Aqualectra no ta hasi distinshon entre personanan ku ta paga tiki tiki i esnan ku no ta paga nada.”

Tambe e ta mustra ku pa Aqualectra no ta importá ku ta un hende ku normal sa paga 50 florin na koriente pa luna i ku a kuminsá paga 25 florin òf un negoshi ku ta hòrta míles di florin pa luna. “Ta tur ta haña e mesun but di 5.200 florin i mester paga esaki den un tiru.”

Aki Gerard ta di opinion ku mester tin un diferensia den trato di parti Aqualectra entre esnan ku ta demostrá disponibilidat pa paga i esnan ku no ta paga ètòl. “Ami, parlamentario Elvin Gerard ta pidi pordon pa tur esnan ku a faya i haña un but, pero e trato ku nan ta risibí no por.”

“Si por duna kompanianan grandi eksonerashon di mas ku 3 miar florin na debe di impuesto, mester por yuda e grupo di siudadanonan aki pa nan tin aksesibilidat na nesesidatnan básiko manera awa i koriente”, Gerard a finalisá bisando.

Foto:

...Elvin Gerard...