WILLEMSTAD. - Minister Suzanne Camelia-Römer na su turno a duna di konosé ku e ta para ful tras di su koleganan minister riba e partikularidat Baoase pa motibu ku manera kos ta bayendo awor aki simplemente no por. No por sigui tolerá mas. Mester kue hende sera

Relashoná ku e suseso lamentabel ku a tuma lugá den fin di siman tras di lomba, kaminda ku un manifestashon a desaroyá den destrukshon di Baoase, Minister Camelia-Römer durante un rueda di prensa a duna di konosé ku e tambe ta di akuerdo ku manifestashon, pero hamas i nunka e lo por ta di akuerdo ku hende ta tuma lei den nan man.

Minister a splika ku biaha pasá a manifestá i a kima Sentro Pro Arte, a drenta kima kas di Gezaghebber, a kima kashi di UTS i e kosnan aki mester para.

Minister a enfatisá ku pa polis wak e videonan bon, pa saka afó ken ta esnan  ku a kometé destrukshon i aktonan ilegal, pa atendé ku e hendenan aki. Nos ta hopi robes, Camelia-Römer a bisa.

E kaminda di kana ta simpel, si un hende no ta di akuerdo ku un kos, mester yama polis pa atendé ku e loke ku bo no ta di akuerdo kuné. Pues Polis tei pa atendé i pone òrdu.

Pero kibra propiedat di hende manera por ehèmpel den e kaso aki, a kibra un porta ta un akto di destrukshon. Kometé  violensia, spanta e turistanan, esakinan tur bou di e preteksto di ta defendé Kòrsou, poniendo pan di 160 hende, tata i mama na peliger i negoshinan ku ta entrega produkto i di e forma aki pone desaroyo di turismo na peliger, daña nòmber di pais i pa kiko, djis pasobra supuestamente tin un porta ilegal.

Si un hende ta haña ku tin kosnan ilegal tumando lugá, e pais demokrátiko aki ta ofresé hopi posibilidat.

Por bai korte, por bai Ministerio Públiko i asta por manifestá. Pero manifestashonnan ku ta kaba den distrukshon, simplemente no por sigui i e kosnan aki no ta di tolerá.

Minister Camelia-Römer a enfatisá ku e ke ta hopi habrí, na su opinion e ta haña ku mester sera e hendenan ku a kometé e aktonan aki.

Bai radio papia, kana ku pankarta tur ta liber pa hasi, pero no kibra drenta den propiedat di hende. Bo ta kibrando Kòrsou.

P’esei Minister Camelia-Römer a enfatisá ku e ta para tras di tur minister pa tres òrdu bèk den e komunidat aki.

Finalmente Camelia-Römer a trese bon kla dilanti, pa no papia mes tokante maneho di playa etcetera, pa motibu ku den e kaso aki e punto ku ta den diskushon ta ku Koko ta haña ku e por lanta un pueblo kibra porta di un lugá privá, drenta saka turista for di nan kamber. Asina aki e pueblo aki ta kibra su  mes porvenir. Simplemente no por sigui asina.