WILLEMSTAD.- Ainda no por presensiá santu sakrifisio di misanan. Esei Obispado a anunsiá apesar ku gobièrnu a bisa ku por habri porta di misa bèk.

Den e último Konferensia  di Prensa di Gobièrnu di Kòrsou, nos por a tuma nota ku Gobièrnu a anunsiá ku portanan di misanan por habri pero ku un kantidat moderá te ku 25 persona i riba djadumingu esaki lo no por ta posibel pa motibu di medidanan.

Komo Iglesia aparte di ta mantené diálogo ku Gobièrnu nos ta tene na kuenta ku e medidanan emití den e pandemia aki. Miéntras tantu Iglesia ta asumí semper su responsabilidat propio pa emití e medidanan ku ta konta den Iglesia teniendo kuenta ku nos normanan, liturgia i tambe e aspekto pastoral.

Djadumingu ta e sentro di nos liturgia Kristian for di kua nos diferente otro selebrashonnan litúrgiko ta surgi. Ta e dia ku nos ta yama dia di Señor konmemorando su bida, morto i resurekshon. P’esei partisipashon di fielnan riba djadumingu na misa ta esensial den enseñansa di Iglesia Katóliko.

Pa e motibu aki, nos kier trese na boso konosementu ku por lo pronto e dekreto emití pa Obispu di Willemstad Mgr. Luis A Secco ta keda vigente. Santu Sakrifisio di misa lo no por ta presensial riba ningun dia, te na momentu ku Obispu emití un dekreto nobo.

Ta deseo di Obispado pa mas pronto posibel e komunidat Kristian por reuní pa selebrá liturgia, pero laga nos sigui animá otro i sigui resa pa nos por sali for di e pandemia aki.