170 mion “boekhoudkundig”

WILLEMSTAD.-Den reunion di Parlamento awe mainta, direktor general di Banko Seguro Sosial (SVB) Phillip Martis a informá ku e reserva legal di SVB ta balorá na 170 mion florin. Esaki ta reserva pa momentunan ku tin un pandemia i den kaso di Covid-19 ta mundialmente ta katalogá Covid komo un pandemia. Martis ta sigui splika ku lo por usa e reservanan aki solamente pa kosnan ku tin di haber ku e pandemia. Por ehèmpel ta kalkulá ku ta haña ménos sèn na prima i di otro banda mester hasi mas gastu debí na e pandemia. Tur eseinan por keda finansiá for di e fondo. E direktor a enfatisá ku e reserva ta “boekhoudkunding”, no ta plaka ku por hisa duna gobièrnu.

El a splika ku tin fondonan ku SVB a invertí, tin tambe debe di gobièrnu i otronan na SVB. Tambe tin bono di OBNA i e plakanan ei no ta disponibel mes ora. Di forma hopi kla e direktor a splika ku no por kue e suma di 170 mion for di e reserva. Fin di e aña aki lo mester wak kua parti di dje por usa pa finansiá primanan ku a kai atras i tambe e gastunan èkstra ku a hasi debí na e pandemia.