WILLEMSTAD.- Djaweps último den oranan di anochi wardakosta a logra interseptá un lancha tipo “Yola” ku 26 persona indokumentá abordo di ku 20 tabata hende hòmber i 6 tabata hende muhé.
E personanan a ser hibá na Baya Beach kaminda e tim multidisiplinario konsistiendo di miembronan di Wardakosta, GMN i Polis tabata presente pa hasi e kontròlnan nesesario. Despues di e kontròlnan, e indokumentadonan a ser entregá na polis pa sigui ku mas investigashon.
Bosero di Kuerpo Polisial di Kòrsou Imro Zwerwer a indiká na EXTRA ku ainda no sa kiko ta bai pasa ku e personanan apesar ku ya ayera un grupo di 18 a keda deportá bèk pa nan pais. E grupo di 18 aki a haña un chèns pa bai bèk mirando ku a hasi uso di e buelo ku a trese persona ku a keda repatriá pa Kòrsou.
E personanan ku a drenta Kòrsou sin dokumento djaweps último, lo keda den departamento di barak te dia bini un solushon.
