WILLEMSTAD.- Ainda minister di Finansa, Javier Silvania no a manda e dokumentonan ku frakshon di PAR a pidi pe relashoná su desishon pa eksonerá 3 miar florin na debe di impuesto. Lider polítiko i lider di frakshon di PAR, Quincy Girigorie a manda un karta di rekordatorio ayera pa presidente di parlamento pa por risibí e dokumentonan.

Segun Girigorie bou di tur sirkunstansia mester bini un reunion públiko riba eksonerashon di debe di impuesto, esta sea ku risibí e dokumentonan pidí òf laga. Girigorie ta bisa ku sin e dokumentonan kontinuashon di e reunion djaluna 19 ougùstùs awor no tin sentido i ta p’esei el a pidi pa haña e dokumentonan pa mas tardá 13 ougùstùs último pa parlamento por prepará i hasi su trabou pa kontrolá gobièrnu manera debe ser.

“Mirando e periodo largu ku a pasa for di inisio di e reunion i pa parlamento por hasi su trabou di kòntròl di maneho di gobièrnu na un forma efektivo, suskrito pa medio di e karta aki ta aserká minister ku e petishon pa manda tur dokumento, konseho i desishonnan relevante ku a kondusí na e desishon pa eksonerá algun miar florin di debe di impuesto, inkluso e instrukshon formal di minister di Finansa pa hasi e eksonerashon aki promé ku e reunion reanudá”, Girigorie a skibi den su promé karta 7 ougùstùs último. E reunion di Komishon Sentral di parlamento a inisiá 11 mei 2023 i ta kontinuá 19 ougùstùs awor ku ta mas ku 1 aña i 3 luna despues.

Haña e dokumentonan djis promé ku reunion kuminsá tampoko ta aseptabel, Girigorie ta bisa i ta konfia ku presidente di parlamento, Charetti America-Francisca ta garantisá ku parlamento por funshoná i kumpli ku su tarea di kontrolá gobièrnu na e nivel. “Esaki ta algu ku no por guli manda abou.”

Miéntras ku e desishon di minister pa duna eksonerashon ta data for di yanüari 2023, e echo ku Silvania tin 1 aña i 3 luna sin kontesta preguntanan di parlamento riba su desishon i e base legal pa a hasi esaki ta posiblemente un rekòr nobo, esta Girigorie. Den un konseho resien Konseho Sosial Ekonómiko (SER) a trese dilanti Silvania no tabatin eksonerashon legítimo bálido pa a duna e eksonerashon di debe di impuesto.

E konseho ta a base di un proposishon di lei ku Silvania a manda pa parlamento pa regla e base legal pa su desishon, despues ku el a duna e eksonerashon kaba. Ni e ordenansa di lei pa kolektá impuesto (“invordering”) manera Silvania a manda pa parlamento ni otro ordenansanan di leinan fiskal no tin un areglo ku ta duna minister di Finansa e outorisashon pa duna eksonerashon di pago di impuesto (“buiten vordering stellen”), SER ta bisa.

For di esaki por konkluí ku minister di Finansa ni den su ròl komo legisladó i ni komo ehekutivo por a tuma e desishon legítimo bálido pa duna eksonerashon di pago di debe di impuesto. Ta bin aserka ku e minister no a tene su mes na e práktika fiho na Kòrsou pa duna un “aanschrijving” ora ta tuma medidanan temporal pa sania debe di impuesto antisipando riba un areglo legal, SER ta trese dilanti.

Tambe SER ta konkluí ku Silvania a tuma medida pa sania debe di impuesto sin un base hurídiko. E ponensia aki segun SER ta haña sosten tambe den e intenshonnan di Silvania pa formalisá su pakete di medida ku el a tuma pa medio di e proposishon di lei ku el a manda resien pa parlamento.

Foto:

...Quincy Girigorie...