WILLEMSTAD.- Abogado mr Athena Sulvaran, durante tratamentu di e kaso den korte di apelashon di su klientenan L. “Chaini ” òf “Michelito” Yeung (18) i E. “Buch” òf “Micho” Jamanica (20), a pidi e tribunal di Hof pa pospon’é e kaso, despues ku abogado general a hasi di demanda di 15 aña i mei pa Yeung.

Ámbos akusado a keda akusá pa poseshon di 2 arma di kandela outomátiko, mas 73 bala, dia 23 di yanüari 2019 den un vehíkulo.

Den korte di promé instansia, hues a apsolvé e akusadonan di tur kulpa, pero Ministerio Públiko no a bai di akuerdo i a apelá e sentensia.

E akusadonan no a presentá den sala di korte i e tribunal di Hof a bai di akuerdo pa trata e kaso den nan ousensia.

Despues ku abogado Sulvaran a tende e demandanan haltu di fiskal pa Yeung, el a pidi e tribunal pa posponé e kaso i asina duna Yeung chèns pa por bin korte, pa presensiá su kaso.

E abogado a remarká ku OM sa keda wanta sierto kasonan 1 aña proforma, miéntras e sospechoso ta enkarselá, ku na su opinion ta algu inhustu. Pero awor dor ku su klientenan ta den libertat, si no ke wanta e kaso pa dun’e un último oportunidat pa por bin korte.

Abogado general a pidi e tribunal pa rechasá e petishon, pa motibu ku Yeung tabata sa ku su kaso lo a keda tratá den korte e dia ei.

Yeung ku a keda kondená pa e kaso di atrako i tabata enkarselá, pero a bai den libertat debí na un fayo ku a tuma lugá den su prosedura. Despues di a bai deliberá, e tribunal di Hof a bai di akuerdo ku abogado general i a sigui ku tratamentu di e kaso.

Abogado Sulvaran a bisa ku el a pidi pa posponé e kaso, pa motibu ku ta trata di un hóben i e kastigu ku abogado general a pidi, ta demasiado haltu.

Segun e abogado, e tabata ke pa e tribunal duna Yeung un oportunidat, pa e mes presensia e kaso.

Durante su defensa, e abogado a bisa ku no ta paso nan a haña un telefòn den e tas ku tabatin e arma,  kemen ku e armanan ta di dje.

Segun e abogado, doño di e armanan a responsabilisá su mes pa nan kaba. El a sigui bisa ku e simpel echo ku den e tas tabatin un telefòn ku nan ta bisa ta di su kliente, no ta hasi ku tur e armanan tambe ta di dje, ni ku e sa ku tabata tin arma den e tas.

E abogado a bisa, polis no a duna e sospechosonan chèns di kontestá pregunta tokante e telefòn. No a puntra nan di ken e telefòn ta, kon bin e telefòn ta den e tas etc. Segun e abogado, gewon nan a saka nan konklushon.

Pa loke ta trata e demanda di kastigu, e abogado a bisa ku un mucha di 20 aña haña un kastigu haltu asina, no ta aseptabel.

Segun e abogado, prizòn por ehèmpel, no tin programa etc pa formashon.

“Bo no por sera un mucha di 20 aña, 15 aña i mei, sabiendo ku ei den lo e no risibí nada di formashon, paso aki 15 aña si e mester sali, ta un hende sin niun perspektiva, ku lo tin konsekuensia pa su mes i henter komunidat”, segun e abogado. E abogado na final a pidi e tribunal di Hof pa tene kuenta ku e puntonan ku el a trese dilanti.

Aki 3 siman e tribunal lo dikta sentensia.