WILLEMSTAD.- Apesar di ta nenga di baha preis di kasnan ku a konstruí robes na Wechi, tin sierto gastu mas chikí relashoná ku kasnan konstruí na Wechi ku si Fundashon Kas Popular (FKP)/ Wechi Management Group (WMG) ta dispuesto di paga. Sinembargo no ta kompensá tur e defisiensianan mas chikí tampoko. Un disputa ku lo bai terminá ku tur probabilidat den korte.
Un di fayonan di konstrukshon ta ku FKP/WMP a usa material mas barata pa basha riba e dak di e kas komo protekshon. Segun e spesifikashon di e kontrato di kompra i benta ta bisa ku lo usa e material TPO, pero den realidat a usa un material mas barata.
Segun abogado Bertie Braam ta informá kumpradónan den un karta fechá 14 yüni, FKP/WMG ta dispuesto di paga nan un diferensia den presis di 1.600 florin, algu ku e kumpradónan a nenga den pasado. Nan no ta deseá pa risibí material inferior for di lokual a palabrá.
Tambe FKP/WMG ta bisa di lo remplasá sanitario i mosaiko di baño ku ta kibrá/dañá. E problema di sanitario manera EXTRA a informá anteriormente ta sinembargo muchu mas grandi.
Tin problema ku konstrukshonnan straño ku baño kaminda a hisa e plafòn di e baño i pone bentana te na haltu. Mester usa trapi pa por yega na e bentana.
Tambe e baño ku por mira den e kas modelo ku FKP a mustra e kumpradónan, ta trahá ku kompletamente otro koló di mosaiko kompará ku e kasnan ku a entregá. Mas aleu FKP/WMG ta bisa ku ta instalá un kranchi pafó di e kasnan loke tabata otro reklamo di e kumpradónan, esta ku no tin kranchi pafó.
Mas aleu Braam ta bisa den su karta ku el a komprondé ku FKP/WMG ta dispuesto di paga gastunan di transporte aéreo i estadia na Kòrsou ku e kumpradónan a hasi. Asina ta ku kumpradónan riba indikashon a biaha pa Kòrsou despues ku FKP/WMG a bisa nan ku e kas ta kla, pero ora a yega Kòrsou a ripará ku no a basha ni betòn di e dak di kas ainda.
Te aki e kompensashonnan di parti FKP/WMG ta yega. E problema mas grandi, esta ku a traha e kasnan robes, esta mas chikí ku lokual a kumbiní den kontrato di kompra i benta, Braam ta bisa ku FKP/WMG no ta dispuesto di kubri esaki konforme loke ta stipulá den artíkulo 6 di e kondishonnan pa a pasa e akta di “erfpacht” di e tereno ku e kasnan ta trahá riba dje pa e kumpradónan.
MAS
Tin un kantidat di reklamo mas ku FKP no ta para ketu na dje den su karta. E echo ku FKP/WMG no a entregá e kasnan riba fecha palabrá ta kousa di gastu èkstra pa e kumpradónan pasobra nan no por a drenta e kas ku nan a kumpra.
Tin problema ku protekshon pa murayanan di kushina ku no a instalá, pero si a paga pe den e preis di e kas. Tambe tin kas ku a lubidá di instalá baki di laba tayó den kushina.
Mas di e problemanan ta ku porta di kurá di kas ku ta mas smal i mas haltu ku lokual a kumbiní ora di benta. Esaki a trese problema ku instalashon di e portanan.
Pa solushoná e problema aki a disidí di pone algun blòki adishonal riba e muraya di kurá pa asina e por instalá e porta. Esaki un biaha mas no ta konforme e akuerdo di e konstrukshon ku e doñonan di kas a firma pe. Den bista di e doñonan a kònkel algu pa solushoná un problema loke a keda masha mahos.
Finalmente ta asina ku kumpradónan ta pagando un suma tur luna pa mantenshon di arianan komun ku tur hende ta hasi uso di dje. Ta trata di por ehèmpel kontròl na entrada di e proyekto, iluminashon anochi, mantenshon di stupi, kayanan i tambe pa tene e aria limpi kòrtando yerba shimaron ku ta krese.
Realidat segun e doñonan di kas ta ku ainda no tin iluminashon na drechi anochi, no a traha stupi pa kana ariba, no ta limpia yerba shimaron ku ta kresiendo pa loko i a pone un “hefboom” improvisá ku un persona ku ta sinta wak ken ta subi e tereno. Esaki segun e doñonan di kas no ta konforme palabrashon i lokual nan ta paga pe.
