Harms: RdK mes tabatin e plan di ‘Fuel Farm’
WILLEMSTAD.- Kòrsou mes por a hasi e negoshi di importá produkto petrolero, meskla esakinan i bende atrobe pasobra e no ta eksigí hopi invershon. No tabatin mester di a sera e dil aki ku Oryx Midstream, representante di trahadónan di kontratista riba tereno di Isla, Hensley Harms ta opiná.
“Ta un modelo ku direktor anterior di Refineria di Kòrsou (RdK), Marcelino Delannoy a plantia den pasado. Miéntras ta buska un operadó ta usa tur loke ta disponibel na kapasidat di tanki pa meskla produkto den dje, e asina yamá RdK Fuel Farm.”
Esaki, segun harms lo a produsí sèn pa paga trahadó i tiki tiki lo a amplia kapasidat na Bullenbaai i Emmastad i sigui amplia e kantidat di produkto ku ta meskla i bende atrobe. “Banda di esei e plan tabata pa buska un interesado pa habri e refineria miéntras ku ta usa otro partinan di e tereno pa stimulá otro industria manera planta di gas i proyektonan di transishon energétiko.”
Pues segun Harms Kòrsou mes por a hasi esaki i den un periodo di 5 aña i no mester di 30 aña pa logra e proyekto aki. E direktor interino aktual di RdK, Patrick Newton tambe tabata den e tim di e èks direktor De Lannoy, Harms ta sigui bisa.
“Pero aworakí Newton mes ta direktor interino i e tin instrukshon polítiko riba dje i mester wak e kosnan kisas otro, pasobra a primintí den kampaña ku ta habri e refineria atrobe. A saka tur hende for di RdK i CRU, ku segun nan no ta sirbi i pone nan mes hendenan den e kompania.”
Pero despues di mas ku 3 aña di e aktual gabinete, Harms ta sigui bisa, ta mirando kiko ta e resultado di e desishonnan ku a aktual gobernashon a tuma. “Nan a hala e plan di RdK Fuel farm un banda, pero nan no por a habri e refineria ku tur e tiradónan di pará ku nan a presentá kuné ku plannan dudoso ku ta bou di investigashon.”
Ta asina, segun Harms a yega na un kontrato di hür di 30 aña ku Oryx Midstream pa nan bin meskla i almasená sin ku komunidat sa ta kiko ta detayenan di e kontrato ku a firma ku nan i kiko Oryx Midstream su plan di invershon ta. “ No no sa ki posibel ‘claim’ den futuro ta mará na e kontrato òf kiko ta pasa aki 3 pa 5 aña si disidí ku no ta sigui mas ku e kontrato.”
Na opinion di Harms e anunsio aki ta mas bien parti di kampaña ku MFK a inisiá kuné pa elekshon 2025 i a kore sera un dil ku e Oryx Midstream i despues ta wak kiko ta pasa. “Basta por bisa ku a habri e refineria.”
E deklarashonnan di Harms ta parti di bastante opinion sképtiko ku tin rondó di e kontrato. Den e komentarionan ku ta kore tin eks personal di staf di Refineria Isla BV ku ta bisa ku e 70 mion dòler na invershon ku ta papia di dje den 3 pa 5 aña ta kisas sèn pa drecha poko di e tankinan tipo “dome” na Bullenbaai.
E suma aki no ta yega na pa revisá ni un “crude distiller”. Pa revisá e “catcracker” so mester di un invershon di entre 200 pa 300 mion dòler den 6 luna di tempu.
Esaki ta motibu ku tin vários persona ta konkluí ku no ta bai refiná krudo mas na Refineria Isla kontrali na e promesa ku a hasi e trahadónan den kampaña na 2021.
Foto:
…Hensley Harms…
